पूर्व सञ्चार तथा सूचना प्रविधिमन्त्री गोकुल बाँस्कोटाको भक्तपुर लोकन्थलीस्थित घरमा प्रेसर कुकर बम विष्फोट गराउने कार्यमा संलग्न भएको आशंकामा प्रहरीले एक जनालाई पक्राउ गरेकाे छ ।

पक्राउ पर्नेमा विप्लव समूह भक्तपुर जिल्ला समिति कमिटी सदस्य देव गुरुङ रहेको प्रहरीले जनाएको छ । जिल्ला प्रहरी कार्यालय भक्तपुरका प्रमुख एसपी सविन प्रधानका अनुसार गुरूङलाई जडिबुटीस्थित सुकुम्बासी बस्तीबाट पक्राउ गरिएको हो ।

बुधबार बिहान पौने ८ बजे पूर्वमन्त्री बाँस्कोटाको घरमा बम विष्फोट गराइएको थियो । विप्लव नेतृत्वको नेकपाले घटनाको जिम्मेवारी लिँदै १० बुँदे विज्ञप्ति सार्वजनिक गरेको छ । १० बुँदे विज्ञप्तिमा पूर्वमन्त्री बाँस्कोटालाई विभिन्‍न प्रकरणमा मुछिएको आरोप लगाइएको छ ।

नेपाल कम्युनिष्ट पार्टी (नेकपा)ले घटनाको भर्त्सना गरेको छ । कार्यकारी अध्यक्ष पुष्पकमल दाहालद्वारा जारी विज्ञप्तिमा घटनामा संलग्नलाई कानुनबमोजिम कारबाही गर्न सरकारसँग माग गरिएको छ ।

प्रकाशित समय १२:३२ बजे