कोभिड–१९ (कोरोना भाइरस)को संक्रमण फैलिन नदिन सरकारले गरेको लकडाउनबाट हवाई सेवासमेत बन्द भएपछि सुदूरपश्चिम प्रदेशमा कोरोना आशंका गरिएका व्यक्तिको रगत परीक्षणको नमूना काठमाडौं पठाउन समस्या भएको छ ।

सुदूरपश्चिममा प्रयोगलाशा नभएका कारण दुईदिन अघिसम्म कोरोना आशंका गरिएका व्यक्तिको रगत परीक्षणको नमूना सेती प्रादेशिक अस्पतालले सुदूरपश्चिम प्रदेश जनस्वास्थ्य प्रयोगशाला, तारानगरलाई पठाउने गरेको थियो । त्यहाँबाट हवाईजहाजमार्फत काठमाडौंको टेकुस्थित राष्ट्रिय जनस्वास्थ्य प्रयोगशालामा नमूना पठाउने गरे पनि हवाइ उडानसमेत नहुँदा समस्था जटिल बनेको हो । यसरी धनगढीबाट रगतको नमूना काठमाडौं पठाउँदा त्यसको रिपोर्ट आउन तीन दिन लाग्ने गरेको थियो ।

लकडाउनका कारण मंगलबारदेखि हवाई सेवा बन्द भएका कारण कोरोनाको आशंका गरिएका व्यक्तिको रगत नमूना काठमाण्डौं पठाउन नसकिएको प्रदेश जनस्वास्थ्य प्रयोगशालाकी निमित्त निर्देशक अस्मिता सापकोटाले बताइन । उनका अनुसार हालसम्म सेती प्रादेशिक अस्पतालबाट १४ जनाको नमूना काठमाडौैं पठाइएको र सबैको रिपोर्ट नेगेटिभ आएको छ ।

सामाजिक विकास मन्त्रालयका स्वास्थ्य महाशाखा प्रमुख नरेन्द्रसिंह कार्कीले ‘स्वाब’ परिक्षणमा लकडाउनले प्रत्यक्ष असर पारेको बताए । उनले भने, ‘विमान नउड्ने भएपछि संकलन भएका स्वाव कसरी पठाउने भन्ने समस्या भएको छ ।’ जिल्लामा संकलित नमूना पनि स्वास्थ्यकर्मीहरुले सवारी साधनबात ल्याउने गरेको बताए ।

सुदूरपश्चिम प्रदेशको सेती प्रादेशिक अस्पतालले आइतबारसम्म आठ जनाको ‘स्वाब’ परिक्षणका लागि काठमाडौं पठाइसकेको छ । जसमा सात जनाको रिपोर्ट ‘नेगेटिभ’ आएको छ । एक जनाको भने रिपोर्ट आउन बाँकी रहेको सेती प्रादेशिक अस्पतालका डा. जगदिश जोशीले बताए ।

डा. जोशीले सोमबार एक र मंगलबार थप तीन जनाको ‘स्वाब’ संकलन गरिएको बताए । ‘थप दुईजना पनि भर्ना भएका छन् । संकलित नमूना काठमाडौँसम्म कसरी पठाउने भन्ने अहिले मुख्य समस्या भएको छ,’ उनले भने ।

प्रकाशित समय १६:१६ बजे