दक्षिण एसियाली सहयोग संगठन (सार्क)का ८ मुलुकहरुका कोरोना संक्रमितको संख्या साढे ३४ हजार नाघेको छ । बुधबार बिहानसम्म सार्कका सबै देशमा गरी ३४ हजार ५६० जनामा संक्रमण देखा परेको हो ।

सार्कका सबै देशमध्ये भारतमा बढी प्रकोप फैलिएको छ । भारतमा अहिलेसम्म २० हजार ८० जनामा संक्रमण देखिएको छ । त्यस्तै ६४५ जनाले ज्यान गुमाएका छन् । गएको २४ घण्टामा मात्रै भारतमा एक हजार ५४१ जनामा नयाँ संक्रमण देखिएको छ भने ५३ जनाको ज्यान गएको छ । त्यस्तै अहिलेसम्म भारतमा तीन हजार ९७५ जनाको उपचार सफल भएको विश्व स्वास्थ्य संगठनले जनाएको छ ।

सार्कका मुलुकमध्ये दोस्रो बढी भाइरस फैलिएको मुलुकको रुपमा पाकिस्तान देखा परेको छ । पाकिस्तानमा अहिलेसम्म ९ हजार ५६५ जनामा संक्रमण देखिएको त्यहाँको स्वास्थ्य मन्त्रालयले जनाएको छ । त्यस्तै २०१ जनाले ज्यान गुमाइसकेका छन् । गएको २४ घण्टामा मात्रै पाकिस्तानमा ६७३ जनामा संक्रमण देखिएको छ भने २५ जनाको ज्यान गएको छ । अहिलेसम्म दुई हजार १५३ जनाको सफल उपचार भएको छ ।

सार्कमा तेस्रो बढी संक्रमण देखिएको देशको रुपमा बंगलादेश देखिएको छ । बुधबार बिहानसम्म बंगलादेशमा तीन हजार ३८२ जनामा संक्रमण देखिएको छ भने ११० जनाले ज्यान गुमाइसकेका छन् । गएको २४ घण्टाभित्रै ४३४ जनामा नयाँ संक्रमण देखिएको भने ९ जनाको ज्यान गएको छ । त्यस्तै अहिलेसम्म ८७ जनाको सफल उपचार भएको जनाइएको छ ।

वर्ल्डोमिटरको तथ्यांकअनुसार अफ्गानस्थान एक हजार ९२ जनामा कोरोना देखिएको छ । त्यस्तै अहिलेसम्म ३६ जनाले ज्यान गुमाएका छन् । गएको २४ घण्टामा मात्रै अफ्गानस्थानमा ६६ जनामा नयाँ संक्रमण देखिएको छ । त्यस्तै अहिलेसम्म १५० जनालाई सञ्चो भइ अस्पतालबाट डिस्चार्ज भएका छन् ।

श्रीलंकामा ३१० जनामा कोरोना संक्रमण भएको पुष्टि गरिएको छ । एकै दिनमा मात्रै ६ जनामा नयाँ संक्रमण देखिएको छ भने अहिलेसम्म ७ को ज्यान गएको छ त्यस्तै १०२ जनाको सफल उपचार भएको छ ।

माल्दिभ्समा ८३ जनामा संक्रमण देखिएको छ । गएको २४ घण्टामा मात्रै १४ जनामा संक्रमण देखिएको थियो भने अहिलेसम्म १६ जनाको सफल उपचार भएको छ । त्यस्तै नेपालमा पनि अहिलेसम्म संक्रमणको संख्या ४२ पुगेको छ । मंगलबार मात्रै ११ जनामा नयाँ संक्रमण देखिएको थियो । अहिलेसम्म ४ जनाको सफल उपचार भएको छ ।

सार्कका आठ मुलुकमध्ये सबैभन्दा सानो मुलुक भुटानमा अहिलेसम्म ६ जनामा कोरोना देखिएको छ । मंगलबार मात्रै १ जनामा नयाँ संक्रमण देखिएको थियो । अहिलेसम्म भुटानमा २ जनाको सफल उपचार भएको छ । सार्कमा एकै दिनमा मात्रै दुई हजार ७४६ जनामा नयाँ संक्रमण देखिएको हो भने ८७ जनाको ज्यान गएको छ । अहिलेसम्म सार्कमा सञ्चो भएर डिस्चार्ज हुनेको संख्या ६ हजार ४८९ पुगेको छ ।

प्रकाशित समय ०७:३२ बजे