कोरोनाभाइरस (कोभिड १९) संक्रमितबारे स्वास्थ्य तथा जनसंख्या मन्त्रालयले नै गलत सूचना सार्वजनिक गरेको छ । बिहीबार बिहान थप ५ जनामा कोरोना संक्रमण देखिएको भन्दै मन्त्रालयले विज्ञप्ति जारी गरेकोमा केहीबेरपछि सच्याएको छ ।

मन्त्रालयले बिहान ७:१५ बजे विज्ञप्ति  जारी गरी काठमाडौं, कपिलवस्तु, सर्लाही, जनकपुर र महोत्तरमा एक‑एक जना संक्रमित फेला परेको जनाएको थियो ।

यसअघि पनि स्वास्थ्य मन्त्रालयको आधिकारिक सूचनाकै आधारमा समाचार सम्प्रेषण गर्दा गलत सूचना बाहिर ल्याएको भन्दै प्रेस काउन्सिलले १६ वटा सञ्चारमाध्यमलाई स्पष्टीकरण नै सोधेको थियो । प्रेस काउन्सिलका उप‑प्रशासकीय अधिकृत रामशरण बोहोराका अनुसार गलत सूचना सम्प्रेषण गर्ने १६ सञ्चारमाध्यममध्ये ११ वटालाई स्पष्टीकरण सोधिएको थियो भने पाँचवटालाई सचेत गराइएको थियो ।

स्वास्थ्य मन्त्रालयबाट जारी आधिकारिक विज्ञप्तिका आधारमा समाचार प्रकाशित भइसकेकाले जनमानसमा भ्रम र गलत तथ्य सम्प्रेषण भएकोमा न्युज कारोबार क्षमायाचना गर्दछ ।

प्रकाशित समय ११:०२ बजे