सैनिक हवाई महानिर्देशनालयका अवकाश प्राप्त प्राविधिक उपरथीसहित नौ जना सैनिक अधिकृत कारबाहीमा परेका छन् । महानिर्देशनालयमा कार्यरत रहँदा अनियमितता गरेको अभियोगमा नेपाली सेनाका पूर्वउपरथीसहित नौ जना कारबाहीमा परेका हुन् ।

अनियमिततामाथि अनुसन्धान सुरु भएपछि उपरथी सुधीर श्रेष्ठले मंसिरमा राजीनामा दिएका थिए । उनलाई नसिहतसहित जरिवाना तिराउने फैसला समरी जनरल सैनिक अदालतले गरेको छ । अन्य जना सैनिक अधिकृतलाई सचेत गराउने फैसला अदालतले सुनाएको छ ।

सैनिक सूचना तथा जनसम्पर्क निर्देशनालयका अनुसार श्रेष्ठले महानिर्देशक रहँदा कानुनतः पालना गर्नुपर्ने प्रक्रिया पूरा नगरी ५८ लाख ९५ हजार ५९० रुपैयाँ अनियमितता गरेको पाइएको छ । सो रकम असुल उपर गर्न पनि अदालतले आदेश दिएको छ । अदालतले यो प्रकरणमा अन्य सैनिक अधिकारीलाई भने सफाइ दिएको छ ।

प्रकाशित समय २०:४९ बजे