महानगरीय प्रहरी वृत्त दरबारमार्गको खटिएको प्रहरी टोलीले पक्राउ गरेका आठ जना जुवाडेलाई ३० हजार रुपैयाँ धरौटीमा छाड्न काठमाडौँ प्रशासनले आदेश दिएको छ । काठमाडौंका प्रमुख जिल्ला अधिकारी जनकराज दाहालले शुक्रबार धरौटी लिएर छाड्न आदेश दिएका हुन् ।

पक्राउ परेकामध्ये एक जना अशोक अग्रवाल भने गिनीका लागि अवैतनिक दूत हुन् । उनलाई थप १० हजार रुपैयाँ धरौटी मागिएको छ । कमलादीमा रहेको होटल गगौंरबाट सोमबार साँझ प्रहरीले रामचन्द्र सांघाई, अशोक अग्रवाल, नन्द शर्मा, विमल खेतान, विमल आउजा, पुरुषोत्तम अग्रवाल, सुरेश अग्रवाल, गोविन्द अग्रवाल र निक्की जोगाईलाई पक्राउ गरेको थियो ।

पक्राउ परेकामध्ये जोगाइ होटल सञ्चालक हुन् भने बाँकी प्रतिष्ठित व्यापारिक घरानाका व्यक्ति हुन् । उनीहरुका साथबाट प्रहरीले २ लाख ७७ हजार रुपैयाँ र जुवा खेल्न प्रयोग भएको १७९ वटा सिक्का पनि बरामद गरेको थियो ।

प्रकाशित समय १८:११ बजे