धनुषाको बटेश्वर गाउँपालिकाको क्वारेन्टिनमा बसेका नौ जना युवाको पिसिआरका लागि स्वाब संकलन गरेको ११ दिनसम्म पनि रिपोर्ट नआएपछि आरडिटी गरेर घर पठाइएको छ । पिसिआरका लागि स्वाब संकलन गरिएकासहित १६ जनालाई शुक्रबार घर पठाइएको हो ।

पिसिआरका लागि बटेश्वरमा जेठ १२ गते नै नौ जनाको स्वाब संकलन गरेर काठमाडौँस्थित राष्ट्रिय प्रयोगशाला टेकु पठाइएको थियो । ११ दिनसम्म पनि रिपोर्ट नआएपछि लामो समय क्वारेन्टिन बसेका उनीहरुलाई आरडिटी चेकजाँच गरी आज घर पठाइएको बटेश्वर गाउँपालिकाका स्वास्थ्य संयोजक रुद्रनारायण यादवले जानकारी दिए ।

बटेश्वर ५ शान्तिपुरको श्री काली जनज्योति आवासीय विद्यालयको क्वारेन्टिनमा यसअघि गरिएको पिसिआरको रिपोर्टअनुसार एक स्वास्थ्यकर्मीसहित ६ जनामा कोरोनाभाइरस संक्रमण देखिएको थियो । अहिले सामान्य अवस्था देखिएका उनीहरूलाई क्वारेन्टाइनमा बसिरहँदा स्वास्थ्य समस्या बढ्न सक्ने अनुमानमा सरकारको पछिल्लो निर्देशिकाबमोजिम आरिडिटी परीक्षण गरेर घर पठाइएको यादवले बताए । आरडिटी परीक्षणमा एक जनाको रिपोर्ट पोजेटिभ आएकाले उनको क्वारेन्टिनमै राखेर उपचार गरिने स्वास्थ्य संयोजक रुद्रनारायण यादवले जनाए ।

शुक्रबार १६ जनालाई घर पठाइएसँगै अब क्वारेन्टिनमा बस्नेको संख्या ३३ मा झरेको छ । घर पठाइएकाहरूलाई थप एक साता होम क्वारेन्टिनमा बस्न भनिएको छ ।

प्रकाशित समय १८:०२ बजे