विश्वभर कोरोना संक्रमित करिब ४३ लाखले कोरोना भाइरस जितेका छन् । गएको २४ घण्टामा मात्रै एक लाख २ हजार ९२९ जना डिस्चार्ज भएपछि निको हुनेको संख्या ४२ लाख ९९ हजार ९१० पुगेको छ ।

विश्व स्वास्थ्य संगठनका अनुसार अहिलेसम्म विश्वभर ८२ लाखभन्दा बढी व्यक्तिमा कोरोना संक्रमण देखिएको छ । गएको २४ घण्टामा मात्रै विश्वभर एक लाख ४२ हजार ५४६ जना संक्रमित थपिएपछि संक्रमितको संख्या ८२ लाख ५१ हजार २१३ पुगेको हो ।

भाइरसका कारण ज्यान गुमाउनेको संख्या पनि ४ लाख ४५ हजार पुगेको छ । एकै दिनमा ६ हजार ५९२ जना संक्रमितले ज्यान गुमाएपछि मृत्यु हुनेको संख्या चार लाख ४५ हजार १८८ पुगेको हो । त्यस्तै ३५ लाख ६ हजार ११५ जनाको उपचार भइरहेको छ । त्योमध्ये पनि ५४ हजार ४६९ जनाको अवस्था चिन्ताजनक रहेको छ ।

विश्वभर सबैभन्दा धेरै फैलिएको अमेरिकामा गएको २४ घण्टामा २५ हजारभन्दा बढी नयाँ संक्रमित थपिएका छन् भने ८४९ जनाको ज्यान गएको छ । अहिलेसम्म अमेरिकामा २२ लाखभन्दा बढी संक्रमित थपिएका छन् भने एक लाख १९ हजारभन्दा बढीको ज्यान गएको छ ।त्यस्तै ब्राजिलमा संक्रमितको संख्या ९ लाख २८ हजार नाघेको छ ।

गएको २४ घण्टामा मात्रै ब्राजिलमा ३७ हजारभन्दा बढी संक्रमित थपिएका छन् । त्यस्तै ४५ हजार ४५६ जनाले ज्यान गुमाएका छन् । रसियामा पनि संक्रमितको संख्या बढेको छ । अहिलेसम्म रसियामा ५ लाख ४५ हजारभन्दा बढी व्यक्तिमा भाइरस देखिएको छ भने सात हजारभन्दा बढीले ज्यान गुमाएका छन् ।

प्रकाशित समय ०८:५६ बजे