हुम्लाको एक ऐतिहासिक गुम्बामा ढुंगा कुँद्न (स्टोन कार्भिङ)का लागि कर्णाली प्रदेश सरकारले ७० लाख रुपैयाँ खर्च गरेको छ । रलिङ गुम्बामा ७० लाख खर्च गरेर विभिन्न प्रकारका ढुंगाहरुमा बुट्टेदार आकृति कुँदिएको हो ।

ढुंगा कुँदेर बुट्टेदार बनाइएसँगै रलिङ गुम्बाको स्वरुप नै फेरिएको छ । सजिसजावटले गुम्बालाई पुनः विशाल खस साम्राज्यका प्रतिभाशाली राजा अशोक चल्लबारे जानकारी राख्न चाहनेका लागि उत्सुकता जगाइदिएको छ ।

गुम्बाको अगाडि बुट्टेदार ढुंगा राखेर बाटो र अन्य स्थानलाई सुन्दर बनाइएको छ । करिब दुई हजार ढुंगामा बुद्ध धर्मलाई सम्झाउने चित्र तथा मन्त्रहरु कुँदेर राखिएको वन डिभिजन कार्यालय हुम्लाका प्राविधिक दीपक रावतले जानकारी दिए ।

नेपालकै एक शैक्षिक तथा ऐतिहासिक गुम्बा भएर पनि उचित संरक्षण, सम्वर्धन नहुँदा गुमनाम बन्दै गएको थियो । सजिसजावटपछि गुम्बा दर्शनयोग्य बनेको स्थानीय बताउँछन् ।

वि. सं. १३१२ मा अशोक चल्लको नेपाली भाषाको दोस्रो शुद्ध लेखोट पाइएको यो स्थान मुलुककै ऐतिहासिक दस्तावेज पनि हो । यसको विकास, विस्तार र प्रचारप्रसारमा राज्यले ठूलो लगानी गर्नुपर्ने स्थानीय खोजकर्ता एवं संघीय सांसद छक्कबहादुर लामा बताउँछन् ।

यसअघि पनि विभिन्न निकायबाट बजेट प्राप्त भए पनि सदुपयोग हुन सकेको थिएन । गुम्बाको आन्तरिक सजावटका लागि करोडौं रकम खर्च गर्नुपर्ने स्थानीय लामा पुजारीहरुले बताएका छन् ।

प्राकृतिक सुन्दरताले भरिपूर्ण र शान्त स्थानको रुपमा परिचित रलिङ गुम्बाको बाहिरी सजावट मात्रैले पनि आन्तरिक र बाह्य पर्यटकलाई आकर्षित गर्ने सिमकोट गाउँपालिका ३ का बासिन्दा छिरिङ लामाले बताए । तर, त्यसका लागि प्रचारप्रसार बढाउने र अन्य पर्यटन पूर्वाधार निर्माणमा ध्यान दिन उनको सुझाव छ ।

प्रकाशित समय १४:२२ बजे