अमेरिकी राष्ट्रपति डोनाल्ड ट्रम्पले मंगलबारको निर्वाचनबाट आफू पुनः राष्ट्रपतिमा निर्वाचित भएमा संक्रमण रोग विज्ञ डा. एन्थोनी फाउचीलाई जिम्मेवारीबाट हटाउने चेतावनी दिएका छन् । संक्रमण रोग न्यूनीकरण, नियन्त्रण र व्यवस्थापनसम्वन्धी देशको उच्च जिम्मेवारीमा रहेका फाउचीलाई हटाउने भएका हुन् ।

अमेरिका कोरोनाभाइरसबाट अत्यन्त आक्रान्त बनेका बेला नै हटाउने चेतावनी राष्ट्रपति ट्रम्पले दिएका हुन् । वसन्त ऋतुदेखि नै फैलिएको महामारी नियन्त्रण तथा व्यवस्थापन गर्न राष्ट्रपति ट्रम्प असफल भएको र त्यसमा डा. फाउचीको कुरालाई उनले बेवास्ता गर्ने गरेको आरोप लाग्दै आएको थियो ।

डा. फाउचीले अमेरिकामा संक्रमण फैलिन नदिन वा सचेतना गर्न र व्यवस्थापन गर्न आफ्नो तर्फबाट सक्दो प्रयास गर्दै आएको भन्दै कतिपयले उनको प्रशंसा गर्ने गरेका छन् । कोरोनाभाइरसका कारण अमेरिकामा अहिलेसम्म दुई लाख ३६ हजारभन्दा बढीको मृत्यु भइसकेको छ ।

फ्लोरिडामा आयोजना गरिएको चुनावी कार्यक्रममा ट्रम्पले कोरोना संक्रमण र त्रास फैलिनुमा डा. फाउची पनि दोषी रहेको आरोप लगाए । चुनावी कार्यक्रममा आफ्ना समर्थकले डा. फाउचीलाई निष्कासन गर्नुपर्ने माग उठाउँदै नारा लगाएपछि राष्ट्रपति ट्रम्पले आफूले जितेपछि सो जिम्मेवारी पूरा गर्ने बताए । ‘यस बारेमा मलाई अरु केही भन्नु पर्दैन, केवल निर्वाचनसम्म पर्खिनुस्, निर्वाचन सकिएपछि मैले तपाईंहरुको सुझाव कार्यान्वयन गर्नेछु,’ उनले भने ।

प्रकाशित समय ०७:२९ बजे