म्यानमारमा आइतबार राति भएको सैन्य ‘कु’बारे छलफल गर्न राष्ट्रसंघको सुरक्षा परिषदको आकस्मिक बैठक बोलाइएको छ । मंगलबार सुरक्षा परिषदको आकस्मिक बैठक बोलाइएको हो । बैठकले म्यानमारबारे महत्वपूर्ण निर्णय लिने बताइएको छ ।

म्यानमारका सेनाले सत्तारुढ दल नेसनल लिग फर डेमोक्रेसीकी नेतृ आङ सान सुची तथा राष्ट्रपति विन मिन्टसहित प्रदेशका प्रमुखहरूलाई नियन्त्रणमा लिएर सैन्य ‘कु’ गरेका थिए । लगत्तै म्यानमारमा एक वर्षका लागि संकटकाल घोषणा गरिएको छ । यसअघि पनि म्यानमारमा सन् १९६२ देखि २०११ सम्म सैन्य शासन थियो ।

सैन्य कुपछि राष्ट्रसंघका महासचिव एन्टोनियो गुटेर्रेसले उक्त कार्यको विरोध जनाउँदै लोकतान्त्रिक सुधारमा गम्भीर धक्का लागेको बताएका थिए । म्यानमारको सैन्य कुको अमेरिका, भारत, बेलायत लगायतका मूलुकले विरोध जनाएका छन् । अमेरिकाले म्यानमारमा आर्थिक प्रतिबन्ध लगाउने र अन्य आवश्यक कारवाही गर्ने चेतावनी दिएको छ ।

गत नोभेम्बरमा भएको चुनावमा सुचीको पार्टी नेसनल लिग फर डेमोक्रेसी (एनएलडी)ले सरकार गठन गर्ने बहमुत प्राप्त गरेको थियो । तर सेनाले चुनावमा धाँधली भएको आरोप लगाइरहेको थियो । सेनाले आफूहरुले निष्पक्ष निर्वाचनको आयोजना गर्ने र विजयी हुने पार्टीलाई सत्ता हस्तान्तरण गर्ने बताएका छन् ।

प्रकाशित समय १२:११ बजे