महानगरीय ट्राफिक महाशाखाले ट्राफिक नियम उल्लंघन गर्ने सवारी चालकहरुलाई गर्ने कारबाहीबापतको जरिवाना अब अनलाइनबाटै भुक्तानी गर्न मिल्ने व्यवस्था गरेको छ । बुधबार ई-सेवाका तर्फबाट प्रमुख सञ्चालन अधिकृत रोशन लामिछाने र महाशाखा प्रमुख एसएसपी जनक भट्टराईले अनलाइन भुक्तानी सहमति पत्रमा हस्तक्षर गरे ।

एसएसपी भट्टराईले विश्व अब ‘प्रविधिको दुनियाँ’ भइसकेकाले प्रविधिमा प्रवेश नगरीकन सेवा-सुविधाहरु सुलभ र छिटोछरितो बनाउन नसकिने बताए । त्यसैलाई ध्यान दिई सबै क्षेत्रलाई क्षमताअनुरुप प्रविधियुक्त बनाउँदै लैजानुपर्नेमा उनले जोड दिए । उनले महाशाखा धेरै कुरामा प्रविधिमा प्रवेश गरिसकेको पनि जनाए ।

ई-सेवाका प्रमुख सञ्चालन अधिकृत लामिछानेले यो प्रणालीले धेरैभन्दा धेरै व्यक्तिलाई लाभ पुग्ने विश्वास व्यक्त गरे । अनलाइन भुक्तानी गर्दा जरिवाना बापतको रकम सिधै नेपाल सरकारको राजस्व खातामा जम्मा हुने हुँदा बैंकसम्म गएर पैसा तिर्ने झन्झट हट्ने उनले बताए । महाशाखासँगको अनलाइन भुक्तानी साझेदारीमा आफ्नो संस्थाको पूर्ण साथ रहेको पनि उनले बताए ।

कारबाहीमा परेका चालकले ट्राफिकले काटेको चिट नम्बर उल्लेख गरेपछि जरिवाना रकम देखाउनेछ । सोही ठाउँमा मागेको विवरण भरी सजिलै ई-सेवाबाट रकम तिर्न सकिने महाशाखाले जनाएको छ ।

प्रकाशित समय १५:३० बजे