एकै दिनमा कोरोना संक्रमितको संख्या ९६ हजारभन्दा थपिएको छ । बिहीबार मात्रै ९५ हजार ३२५ जनामा नयाँ संक्रमण देखा परेको संख्या शुक्रबार झन् बढेको छ । शुक्रबार ९६ हजार १७७ जनामा नयाँ संक्रमण देखा परेको हो । अहिले विश्वभर कोरोना संक्रमितको संख्या ४० लाखको हाराहारीमा छ ।

विश्व स्वास्थ्य संगठनका अनुसार अहिलेसम्म विश्वभर कोरोना संक्रमितको संख्या ३९ लाख १३ हजार ५५९ पुगेको छ । त्यस्तै ज्यान गुमाउनेको संख्या पनि बढ्दै गएको छ । शुक्रबार मात्रै पाँच हजार ५८५ जनाले ज्यान गुमाएका छन् । अहिलेसम्म ज्यान गुमाउनेको संख्या दुई लाख ७० हजार ४२२ पुगेको छ ।

वर्ल्डोमिटरको तथ्यांकअनुसार संक्रमितमध्ये १३ लाख ४१ हजार डिस्चार्ज भइसकेका छन् भने २३ लाख दुई हजार १३६ जना उपचाररत छन् । त्योमध्ये पनि ४८ हजार ९६२ जनाको अवस्था गम्भीर रहेको छ । सबैभन्दा बढी संक्रमित अमेरिकामा अहिलेसम्म ७६ हजार ९२६ जनाले ज्यान गुमाइसकेका छन् भने १२ लाख ९२ हजार ५९४ जनामा संक्रमण देखिएको छ ।

संक्रमितमध्ये दुई लाख १७ हजार २५० जना डिस्चार्ज भइसकेका छन् भने ९ लाख ९८ हजार ४१८ जना उपचाररत छन् । त्यस्तै १६ हजार ९९५ जनाको अवस्था गम्भीर रहेको छ । एकै दिनमा मात्रै अमेरिकामा दुई हजार १२७ जनाले ज्यान गुमाए भने २९ हजार ५०२ जना नयाँ संक्रमित देखा परेको विश्व स्वास्थ्य संगठनले जनाएको छ ।

प्रकाशित समय ०७:३० बजे