डडेल्धुरा जिल्लाको पहिलो कोरोना सक्रमित युवकको दोस्रो पटक सेती प्रादेशिक अस्पतालको प्रयोगशालामा गरिएको परीक्षणका क्रममा दोस्रो रिपोर्ट नेगेटिभ आएको छ । जिल्लाको परशुराम नगरपालिका १० का २८ वर्षीय युवकले कोरोना जितेका हुन् ।

सेती प्रादेशिक अस्पतालको प्रयोगशालामा गरिएको परीक्षणमा रिपोर्ट नेगेटिभ आएपछि उनलाई डिस्चार्ज गर्न लागिएको हो । डडेल्धुरा अस्पतालका निमित्त मेडिकल सुपरिटेन्डेन्ट डा. जगदिशचन्द्र विष्टले दुई पटक कोरोना रिर्पोट नेगेटिभ आएपछि उनलाई डिस्चार्ज गर्न लागिएको जानकारी दिए ।

डडेल्धुरा अस्पतालको आइसोलेसनमा उपचाररत युवकले १० दिनमै कोरोना जितेका हुन् । सरकारी कर्मचारीसमेत रहेका ती युवकमा गत जेठ ९ गते कोरोनाको संक्रमण पुष्टि भएको थियो ।

योसँगै सुदूरपश्चिममा कोरोनाको संक्रमणबाट मुक्त हुनेको संख्या ७ पुगेको छ । ५ जना कैलाली र कञ्चनपुरका निको भएर घर फर्कि सकेका छन् भने बाँकेबाट अछामका संक्रमितले पनि कोरोना जिते सकेका छन् ।

प्रकाशित समय १३:३४ बजे