विश्वभर फैलिएको कोरोना भाइरसबाट निको भएर घर फर्किनेको संख्या ९३ लाख नाघेको छ ।
विश्व स्वास्थ्य संगठनका अनुसार पछिल्लो २४ घण्टामा मात्रै करिब ५० हजार संक्रमित डिस्चार्ज भएपछि निको हुनेको संख्या ९३ लाख ४९ हजार ३१७ पुगेको हो ।

वर्ल्डोमिटरको तथ्यांकअनुसार अहिलेसम्म विश्वभर एक करोड ५३ लाखभन्दा बढी व्यक्तिमा कोरोना संक्रमण देखिएको छ । गएको २४ घण्टामा मात्रै करिब दुई लाख ८० हजार नयाँ संक्रमित थपिएका छन् । योसँगै विश्वमा संक्रमितको संख्या एक करोड ५३ लाख ७४ हजार ३९४ जना पुगेको छ ।
विश्वभर अहिलेसम्म ६ लाख ३० हजार २११ जनाले भाइरस संक्रमणबाट ज्यान गुमाएका छन् भने ५३ लाख ९५ हजारको उपचार भइरहेको छ ।गएको २४ घण्टामा मात्रै सबैभन्दा धेरै ब्राजिलमा एक हजार २९३ जनाले ज्यान गुमाएका छन् भने ६५ हजारभन्दा बढी संक्रमित थपिएका छन् ।

त्यस्तै एकै दिनमा अमेरिकामा एक हजार २०५ जनाको मृत्यु भएको छ भने ७१ हजार ९६७ जना थप संक्रमित देखिएका छन् । त्यस्तै भारतमा ४५ हजार ५९९ जना नयाँ संक्रमित थपिएका छन् भने एक हजार १२० जनाको ज्यान गएको भारती सञ्चारमाध्यमले जनाएका छन् ।

प्रकाशित समय १०:१२ बजे