विश्वभर कोरोना संक्रमितको संख्या एक करोड ९० लाख नजिक पुगेको छ । गएको २४ घण्टामा मात्रै करिब दुई लाख ८० हजारभन्दा बढी व्यक्तिमा भाइरस देखिएपछि संक्रमितको संख्या एक करोड ८९ लाख ७५ हजार २५४ पुगेको हो ।

विश्व स्वास्थ्य संगठनका अनुसार अहिलेसम्म ज्यान गुमाउनेको संख्या पनि सात लाख ११ हजार नाघेको छ । गएको २४ घण्टामा मात्रै करिब आठ हजारको ज्यान गएपछि मृतकको संख्या सात लाख ११ हजार २२० पुगेको हो । त्यस्तै अहिलेसम्म एक करोड २१ लाख ६३ हजार ७५४ जनाको सफल उपचार भएको छ ।

वर्ल्डोमिटरको तथ्यांकअनुसार विश्वभर कुल संक्रमितमध्ये ६१ लाखको उपचार भइरहेको छ । उपचार भइरहेकामध्ये पनि ६५ हजार ५४३ जनाको स्वास्थ्य अवस्था चिन्ताजनक रहेको छ । सबैभन्दा बढी प्रकोप फैलिएको अमेरिकामा संक्रमितको संख्या ५० लाख नजिक पुगेको छ । गएको २४ घण्टामा मात्रै ५५ हजार १४८ जनामा संक्रमण देखिएपछि संक्रमितको संख्या ४९ लाख ७३ हजार ५६८ पुगेको हो ।

त्यस्तै अहिलेसम्म एक लाख ६१ हजार ६०१ जनाको ज्यान गएको छ । बितेको २४ घण्टामा मात्रै अमेरिकामा एक हजार ३११ जनाले ज्यान गुमाएका छन् । अमेरिकी स्वास्थ्य विभागका अनुसार कुल संक्रमितमध्ये २५ लाख ४० हजारको सफल उपचार भएको छ भने २२ लाख ७१ हजारको उपचार भइरहेको छ । उपचार भइरहेका १८ हजार ४२४ जनाको भने स्वास्थ्य अवस्था चिन्ताजनक रहेको बताइएको छ ।

प्रकाशित समय ०९:२८ बजे