विश्वभर कोरोना भाइरसबाट ज्यान गुमाउनेको संख्या सात लाख ६३ हजार नाघेको छ । गएको २४ घण्टामा मात्रै साढे ६ हजारभन्दा बढीको ज्यान गएपछि मृत्यु हुनेको संख्या सात लाख ६३ हजार ५५३ पुगेको हो ।

विश्व स्वास्थ्य संगठनका अनुसार विश्वभर कोरोना संक्रमितको संख्या पनि दुई करोढ १३ लाख नाघेको छ । एकै दिनमा मात्रै संक्रमितको संख्या दुई लाख ९४ हजार थपिएपछि कुल संक्रमितको संख्या दुई करोड १३ लाख ५४ हजार ६८९ पुगेको हो ।

त्यस्तै एक करोड ४१ लाख ४८ हजार संक्रमितको सफल उपचार भएको छ भने ६४ लाख ६३ हजारको उपचार भइरहेको छ । उपचाररतमध्ये पनि ६५ हजारको स्वास्थ्य अवस्था चिन्ताजनक रहेको विश्व स्वास्थ्य संगठनले जनाएको छ । सबैभन्दा बढी संक्रमण फैलिएको अमेरिकामा संक्रमितको संख्या ५४ लाख ७६ हजार नाघेको छ ।

एकै दिनमा ६० हजार ६०० जनामा संक्रमण देखिएपछि अमेरिकामा कुल संक्रमितको संख्या ५४ लाख ७६ हजार २६६ पुगेको हो । त्यस्तै ज्यान गुमाउनेको संख्या एक लाख ७१ हजार नाघेको छ । एकै दिनमा मात्रै एक हजार १२० जनाले ज्यान गुमाएका थिए । त्यस्तै २८ लाख ७५ हजारको उपचार भइसकेको छ भने २४ लाख ३९ हजारको उपचार भइरहेको छ ।

ब्राजिलमा पनि संक्रमितको संख्या बढ्दै गएको छ । गएको २४ घण्टामा मात्रै ब्राजिलमा ४९ हजार २७४ जनामा संक्रमण देखिएको छ । अहिलेसम्म ब्राजिलमा ३२ लाख ७८ हजार ८९५ जनामा संक्रमण देखिएको छ भने एक लाख ६ हजारको ज्यान गएको छ । गएको २४ घण्टामा मात्रै एक हजार सात जनाले ज्यान गुमाएका थिए ।

त्यस्तै २३ लाख ८४ हजारको उपचार भइसकेको छ भने सात लाख ८८ हजारको उपचार भइरहेको वर्ल्डोमिटरको तथ्यांकले देखाएको छ ।

प्रकाशित समय १०:४९ बजे