विश्वभर एक करोड ८६ लाख ४६ हजार १९७ जना कोरोना संक्रमित डिस्चार्ज भएका छन् । वर्ल्डोमिटरको तथ्यांकअनुसार दुई करोड ६४ लाख ५६ हजार ५१६ जनामा देखिएको संक्रमणमा एक करोड ८६ लाख संक्रमित उपचारपछि घर फकिएका हुन् ।

विश्व स्वास्थ्य संगठनका अनुसार एकै दिनमा दुई लाख ८५ हजार ७१६ जना संक्रमित थपिएका छन् । त्यस्तै अहिलेसम्म विश्वभर ८ लाख ७२ हजार ४७३ जनाको ज्यान गएको छ । गएको २४ घण्टामा मात्रै पाँच हजार ८५१ जनाले ज्यान गुमाएका छन् भने ६० हजार ९६१ जनाको स्वास्थ्य अवस्था चिन्ताजनक रहेको छ ।

सबैभन्दा बढी संक्रमण फैलिएको अमेरिकामा ६३ लाख ३४ हजारमा संक्रमण देखिएको छ । गएको २४ घण्टामा मात्रै ४३ हजा ८६७ जनामा थप संक्रमण देखिएपछि कुल संक्रमितको संख्या ६३ लाख ३४ हजार ६०४ पुगेको हो । त्यस्तै अहिलेसम्म ज्यान गुमाउनेको संख्या एक लाख ९१ हजार २७ पुगेको छ । बिहीबार मात्रै एक हजार ६३ जनाले ज्यान गुमाएका थिए । त्यस्तै ३५ लाख ७२ हजारको सफल उपचार भएको छ भने २५ लाख ७० हजारको उपचार भइरहेको छ ।

सबैभन्दा बढी संक्रमण फैलिएको दोस्रो ठूलो मुलुकको रुपमा देखिएको ब्राजिलमा पनि कोरोना भाइरस संक्रमितको संख्या ४० लाख ४६ हजार नाघेको छ । बिहीबार मात्रै ४४ हजार ७२८ जनामा संक्रमण देखिएपछि कुल संक्रमितको संख्या ४० लाख ४६ हजार १५० पुगेको छ । त्यस्तै अहिलेसम्म एक लाख २४ हजार ७२९ जनाको ज्यान गएको छ ।

पछिल्लो २४ घण्टामा मात्रै ८३० जनाको ज्यान गएको छ । त्यस्तै ३२ लाख ४७ हजार संक्रमित डिस्चार्ज भएका छन् भने ६ लाख ७३ हजार संक्रमितको उपचार भइरहेको वर्ल्डोमिटरको तथ्यांकले देखाएको छ । छिमेकी मुलुक भारतमा पनि कोरोना संक्रमितको संख्या ४० लाख नजिक पुगेको छ ।

एकै दिनमा मात्रै ८४ हजार १५६ जनामा संक्रमण देखिएपछि कुल संक्रमितको संख्या ३९ लाख ३३ हजार १२४ पुगेको छ । त्यस्तै अहिलेसम्म ६८ हजारभन्दा बढीको ज्यान गएको छ । बिहीबार मात्रै एक हजार ८३ जनाले ज्यान गुमाएका छन् । योसँगै भारतमा ज्यान गुमाउनेको संख्या ६८ हजार ५६९ पुगेको छ ।

त्यस्तै ३० लाख ३२ हजार ९१६ जना डिस्चार्ज भएका छन् भने आठ लाख ३१ हजारको उपचार भइरहेको छ ।  उपचार भइरहेकामध्ये पनि आठ हजार ९४४ जनाको स्वास्थ्य अवस्था चिन्ताजनक रहेको भारतीय स्वास्थ्य विभागले जनाएको छ । रसियामा पनि कोरोना संक्रमितको संख्या १० लाख ९ हजार ९९५ पुगेको छ ।

गएको २४ घण्टामा मात्रै ४ हजार ९९५ जनामा संक्रमण देखिएको थियो । त्यस्तै अहिलेसम्म ज्यान गुमाउनेको संख्या १७ हजार ५२८ पुगेको छ । अहिलेसम्म रसियामा आठ लाख २६ हजार ९३५ जनाको सफल उपचार भएको छ भने एक लाख ६५ हजारको उपचार भइरहेको छ ।

प्रकाशित समय १०:२४ बजे