विश्वभर कोरोना संक्रमितको संख्या तीन करोड ६० लाख नाघेको छ । एकै दिनमा तीन लाख २० हजार संक्रमित थपिएपछि संक्रमितको कुल संख्या तीन करोड ६० लाख ४१ हजार ७८३ पुगेको हो ।

विश्व स्वास्थ्य संगठनका अनुसार अहिलेसम्म १० लाख ५४ हजार ६०४ जनाले ज्यान गुमाएका छन् । मंगलबार मात्रै ६ हजारभन्दा बढीको ज्यान गएको छ । त्यस्तै अहिलेसम्म दुई करोड ७१ लाख ४५ हजार ५२६ जनाको सफल उपचार भएको छ भने ७८ लाख ४१ हजार ६५३ सक्रिय संक्रमित देखिएका छन् । त्योमध्ये पनि ६७ हजार ८२१ जनाको स्वास्थ्य अवस्था चिन्ताजनक रहेको छ ।

सबैभन्दा बढी संक्रमण फैलिएको अमेरिकामा संक्रमितको संख्या ७७ लाख २२ हजार पुगेको छ । गएको २४ घण्टामा मात्रै अमेरिकामा ४३ हजार ६६० जनामा संक्रमण देखिएको छ भने अहिलेसम्म दुई लाख १५ हजार ८२२ जनाको ज्यान गएको छ । त्यस्तै ४९ लाख ३५ हजारको सफल उपचार भएको छ भने २५ लाख ७१ हजारको उपचार भइरहेको अमेरिकी स्वास्थ्य विभागले जनाएको छ ।

दोस्रो बढी संक्रमित फैलिएको भारतमा ६७ लाखभन्दा बढी संक्रमित थपिएका छन् । गएको २४ घण्टामा मात्रै ७२ हजार १०६ जनामा थप संक्रमण देखिएपछि कुल संक्रमितको संख्या ६७ लाख ५४ हजार पुगेको हो । त्यस्तै अहिलेसम्म एक लाख ४ हजारको ज्यान गएको छ । मंगलबार मात्रै भारतमा ९९१ जनाको ज्यान गएको भारतीय स्वास्थ्य विभागले जनाएको छ ।

विभागका अनुसार अहिले भारतमा ५७ लाख ४१ हजारको सफल उपचार भएको छ भने ९ लाख आठ हजारको उपचार भइरहेको छ । त्यस्तै आठ हजार ९४४ जनाको स्वास्थ्य अवस्था गम्भीर देखिएको छ ।

प्रकाशित समय ०९:४८ बजे