विश्वभर कोरोनाभाइरसबाट ज्यान गुमाउनेको संख्या ११ लाख ८० हजार नजिक पुगेको छ । गएको २४ घण्टामा मात्रै साढे सात हजारभन्दा बढी संक्रमितको ज्यान गएपछि मृतकको संख्या ११ लाख ७९ हजार ७९ पुगेको हो ।

विश्व स्वास्थ्य संगठनका अनुसार अहिलेसम्म चार करोड ४७ लाख ४९ हजार ७८२ जनामा संक्रमण देखिएको छ । गएको २४ घण्टामा मात्रै विश्वभर पाँच लाख ९ हजार जनामा संक्रमण देखिएको थियो । त्यस्तै तीन करोढ २७ लाखभन्दा बढी संक्रमित डिस्चार्ज भएका छन् । त्यस्तै एक करोड आठ लाख ४५ हजार सक्रिय संक्रमित देखिएका छन् । त्यस्तै ८१ हजार संक्रमितको स्वास्थ्य अवस्था चिन्ताजनक रहेको विश्व स्वास्थ्य संगठनले जनाएको छ ।

सबैभन्दा बढी संक्रमण फैलिएको अमेरिकामा ९१ लाखभन्दा बढी व्यक्तिमा भाइरस संक्रमण भएको छ । अमेरिकामा राष्ट्रपतिको निर्वाचनले गर्दा भाइरस संक्रमण बढेको बताइएको छ । गएको २४ घण्टामा मात्रै ८१ हजार ५८१ जनामा संक्रमण देखिएको छ । योसँगै अमेरिकामा ९१ लाख २० हजार ७५१ जनामा संक्रमण देखिएको अमेरिकी स्वपास्थ्य विभागले जनाएको छ ।

त्यस्तै अहिलेसम्म ज्यान गुमाउनेको संख्या दुई लाख ३३ हजारभन्दा बढी रहेको छ । बुधबार मात्रै एक हजार ३० जनाले ज्यान गुमाएका थिए । दोस्रो बढी संक्रमित मुलुक भारतमा ८० लाख ३८ हजार जनामा संक्रमण देखिएको छ । गएको २४ घण्टामा मात्रै करिब ५० हजार जनामा संक्रमण देखिएको थियो । त्यस्तै अहिलेसम्म एक लाख २० हजार ५६३ जनाले ज्यान गुमाएका छन् । भारतीय स्वास्थ्य विभागका अनुसार बुधबार मात्रै ५०९ जनाले ज्यान गुमाएका हुन् । यस्तै ७३ लाख १४ हजारको सफल उपचार भएको छ भने ६ लाखभन्दा बढी संक्रमित रहेका छन् ।

प्रकाशित समय ०९:३४ बजे