कोरोना महामारीका बीच पनि अहिले विभिन्न कार्यालयसँगै व्यापार व्यवसाय सञ्चालन छन् । मालपोत कार्यालयदेखि डिपार्टमेन्टललगायतका भीडभाड हुने क्षेत्र पनि अहिले सञ्चालनमा छन् । दसैँ नजिकिएसँगै डिपार्टमेन्टल स्टोरहरुमा भीडभाड पनि निकै बढेको छ ।

कैलालीमा भने सरकारी कार्यालयको एक जनामा कोरोना देखिए एक सातासम्म सिल हुने र निजी क्षेत्रका एक दर्जन बढी कर्मचारीमा कोरोना देखिँदा पनि खुल्लमखुल्ला व्यवसाय भइरहेको छ ।
असोज २६ गते कैलाली जिल्ला मालपोत कार्यालयमा कार्यरत तीन जना कर्मचारीमा कोरोना भाइरसको संक्रमण देखियो ।

कर्मचारीमा कोरोना संक्रमण देखिएपछि कार्तिक ३ गतेसम्म मालपोत कार्यालय सिल गरियो । तर, धनगढी बजारमा सञ्चालित एक व्यवसायिक फार्ममा कार्यरत एक दर्जन भन्दाबढी कर्मचारीमा कोरोना देखिँदासमेत प्रशासनले सिल गरेन ।

धनगढीस्थित चौलानी डिपार्टमेन्टल स्टोरमा कार्यरत १६ जना कर्मचारीमा कार्तिक ३ गते कोरोना संक्रमण पुष्टि भएको थियो । तर, त्यो डिपार्टमेन्टल स्टोर सिल त परै जाओस् स्वास्थ्य मापदण्डमा समेत सुधार हुन सकेको छैन । जिल्ला मालपोत कार्यालय कैलालीले भने कर्मचारीमा कोरोना देखिएसँगै संक्रमण नफैलियोस् भनेर सिल गरेको जनाएको छ ।

भूमिसुधार तथा मालपोत कार्यालय कैलालीका शाखा अधिकृत उद्धवसिंह कार्कीका अनुसार कर्मचारीमा कोरोना देखिएपछि अन्यको रिपोर्ट नआउँदासम्म ८ दिन कार्यालय सिल गरिएको हो । ८ दिन सिल गरेर सबै कर्मचारीको कोरोना परीक्षण गर्दा अन्यमा नदेखिएपछि पुनः काम सुरु गरेको उनले बताए ।

सरकारी कार्यालयको एक जनामा मात्रै कोरोना संक्रमण देखिदा पनि सिल हुने तर, निजी क्षेत्रको दर्जनभन्दा बढी कर्मचारीमा संक्रमण हुँदासम्म सुुरक्षा मापदण्डनै पालना नभएको देख्दा नागरिकमा पनि आक्रोश बढेको छ । सामाजिक सञ्जालमार्फत् समेत धनगढीका अगुवाहरु यसरी कोरोना संक्रमण भयावह बन्ने भन्दै दुःख व्यक्त गरिरहेका छन् ।

कोरोनालाई मजाकमा उडाएर निजी क्षेत्रलाई प्रशासनले नै संरक्षण गरिरहेकोसमेत सर्वसाधारणको आरोप छ । एक दर्जनभन्दा बढी कर्मचारीमा कोरोना देखिँदासम्म पुरानै तरिकाले डिपार्टमेन्टल स्टोर खुल्ला राख्दा कोरोना संक्रमण बढ्न सक्ने धनगढीका प्रिन्स घिमिरेले बताए । यस्ता विषयमा प्रशासनसँगै स्थानीय सरकार गम्भीर बन्नुपर्नेमा उनको जोड छ ।

प्रशासनले पनि सरकारी कर्मचारी र निजीका कर्मचारीमा नै विभेद देखाएको छ । सरकारी कर्मचारीमा त्यही कर्मचारीले काम गर्नुपर्ने नयाँ जनशक्ति थप्न नसक्ने अवस्था भएकाले सिल गर्नुपरेको प्रशासनले जनाएको छ । तर, चौलानी डिपार्टमेन्टल स्टोरले नयाँ कर्मचारीमार्फत् अहिले काम गराइरहेको समेत प्रशासनको दाबी छ ।

चौलानी डिपार्टमेन्टल स्टोरले कोरोना पोजेटिभलाई आइसोलेसनमा राखी नयाँ कर्मचारीमार्फत् काम गराइरहेकाले सिल नगरेको जिल्ला प्रशासन कार्यालय कैलालीका प्रशासकीय अधिकृत शिवराज जोशीले बताए ।

भूमिसुधार तथा मालपोत कार्यालय कैलालीका अन्य कर्मचारीको रिपोर्ट नेगेटिभ आएपछि अहिले नियमित काम सुरु भएको छ । यस्तै कैलालीको गोदावरी नगरपालिकाका एक कर्मचारीमा कोरोना देखिएपछि नगरपालिका सिल गरिएको छ । तर, निजी क्षेत्रमा दर्जनौंको संख्यामा कोरोना संक्रमित देखिँदासम्म एक दिन पनि सिल भएको छैन । निजी डिपार्टमेन्टल स्टोर सिल गर्नमा प्रशासननै चुकेको छ ।

कोरोनाले भयाभह अवस्था सिर्जना गरिरहेका बेला निजी क्षेत्रलाई बचाउन प्रशासनको समेत पूर्ण हात रहेको देखिएको छ । सरकारी कार्यालय सिल हुने, कोरोनाले भयाभह अवस्था सिर्जना हुँदा पनि निजी क्षेत्रलाई संरक्षण गरिरहने भएपछि आगामी दिनमा धनगढी कोरोनाको हब नै नबन्ला भन्न सकिन्न ।

प्रकाशित समय १३:२९ बजे