गौरीफन्टा नाकाबाट प्रहरीको स्कर्टिङमा पठाइएका भारतबाट फर्केका सुदूरपश्चिमका सर्वसाधारण गन्तव्यमा पुग्न थालेका छन् । भारतसँगको नाका बन्द भइसकेपछि सीमा क्षेत्रमा आइपुगेका उनीहरुलाई अनिवार्य रुपमा १४ दिन क्वारेन्टाइनमा बस्ने सर्तमा प्रदेश सरकार र स्थानीय प्रशासनले गन्तव्यतर्फ पठाएको हो ।

तर कतिपयले क्वारेन्टाइनमा बस्न अटेर गरिरहेका छन् । कतै स्थानीयको अवरोध पनि भइरहेको छ । कतिपयले क्वारेन्टाइनमै बस्न नमानेको डोटीका प्रमुख जिल्ला अधिकारी टेकनारायाण पौडेलले बताए । ‘कतिपयले घर जाने जिद्धी गरिरहेका छन् । तर स्थानीय तहले क्वारेन्टाइनमा राख्नका लागि व्यवस्थापन गरिरहेको छ,’ प्रजिअ पौडेलले भने ।

गौरीफण्टा नाकाबाट मंगलबार डोटीका दुई सय १४ जनालाई पठाइएको थियो । त्यसमा सबैभन्दा बढी शिखर नगरपालिकाका ७१ र बडिकेदार गाउँपालिकाका ५१ जना थिए । शिखर नगरपालिकाका मेयर सीताराम जोशीले नगरपालिकामै क्वारेन्टाइनको व्यवस्थापन गर्न समस्या भएको बताउँदै उनीहरुलाई सम्बन्धित वडामा पठाउने तयारी भइरहेको न्युज कारोबारलाई बताए ।

प्रकाशित समय १४:३४ बजे