धनगढी उप–महानगरपालिका १० जुगेडामा प्रहरी सहायक निरीक्षक गोविन्द विकको हत्या भएको क्षेत्रमा सशस्त्र प्रहरी पनि डेढ महिना अघि मृत भेटिएको तथ्य फेला परेको छ ।

धनगढी उप–महानगरपालिका १२ को अस्थायी प्रहरी विट जुगेडाका इन्चार्ज प्रहरी सहायक निरीक्षक गोविन्द विकको हत्या गरेको अवस्थामा मृत फेला परेकै क्षेत्रमा कार्यरत सशस्त्र प्रहरी जवान कुमार सारुमगर मृत भेटिएका थिए ।

सशस्त्र प्रहरीे बर्डर आउट पोस्ट जुगेडामा कार्यरत सारुमगर असोज ९ गते डिउटीमै रहेका बेला वेपत्ता भएका थिए । ९ गते बेपत्ता मगर असोज १० गते दिउँसो उप–महानगरपालिका १४ फूलबारीस्थित खुटिया नदीमा मृत भेटिएका थिए ।

नदीमा डुबेको अवस्थामा मृत भेटिएका मगरको हत्या वा आत्महत्याबारे कुनै खुल्न सकेको छैन । जिल्ला प्रहरी कार्यालय कैलालीले भने सशस्त्र प्रहरी जवान मृत भेटिएको घटनाको अनुसन्धान भइरहेको दाबी गरिरहेको छ ।

जुगेडा क्षेत्र चोरी तस्करीको ट्रान्जिट प्वाइन्ट भएकाले सशस्त्र प्रहरी जवानको पनि तस्करहरुले नै हत्या गरेको आशंका गरिएको छ ।

विकको परिवार शोकमा

ड्युटीकै क्रममा अज्ञात समूहद्वारा हत्या गरिएका कैलालीको धनगढी उपमहानगरपालिका १२ को अस्थायी प्रहरी विट जुगेडाका इन्चार्ज प्रहरी सहायक निरीक्षक गोविन्द विकको परिवार शोकमा डुवेको छ ।

कञ्चनपुरको पुनर्वास नगरपालिका ९ खगाउँका मृतक विकका परिवारले अविभावक नै गुमाएका हुन् । सामान्य परिवारमा जन्मेका गोविन्दका एक÷एक जना दाजुभाइ थिए । उनी माइलो भाइ हुन् । घरको सबै जिम्मेवारी हेर्ने गोविन्द ड्युटीमै मारिएपछि अनाथ जस्तै भएको विकका भतिजा हरी विक पीडा पोखे ।

भूमिहिन विपन्न परिवारको अभिभावक रहेको असई विकले १२ जना परिवारको लालनपालन गर्दै आएका थिए । उनको श्रीमतीसहित साढे २ र अर्को ६ वर्षीया छोरी छन् । प्रहरी सेवामा ३ वर्ष मात्रै बिताएका बिक २ महिना पहिले सुर्खेत जिल्लामा कार्यरत थिए ।

सत्य तथ्य नआउँदासम्म शव नबुझ्ने

ड्युटीकै क्रममा अज्ञात समूहद्वारा हत्या गरिएपछि विकका आफन्तले घटनाबारे सत्थतथ्य सार्वजनिक गर्न माग गरेका छन् । उनीहरुले घटनाबारे सत्यतथ्य नआएसम्म शव नबुझ्ने बताएका छन् । साथै विक परिवारको लालनपालनको जिम्मा राज्यले लिनुपर्ने पुनर्वास नगरपालिका ९ का वडाध्यक्ष नारायणप्रसाद जैशीले बताए ।

प्रकाशित समय २०:०७ बजे