बर्दिबासमा प्रहरीको गोली लागेर गम्भीर घाइते संजय भनेर चिनिने बुद्धिराज न्यौपानेको उपचारको क्रममा निधन भएको छ । प्रहरीको गोली लागेर गम्भीर घाइते न्यौपानेको हेलिकप्टरबाट काठमाडौंस्थित ग्राण्डी हस्पिटलमा लगिएको थियो ।

ग्राण्डी हस्पिटलमा उपचारकै क्रममा गएराति १ बजे मृत्यु भएको अस्पताल स्रोतले जनाएको छ । प्रहरीले बालिकाको शवसहित राजमार्ग अवरुद्ध गरेर बसेका आक्रोशित स्थानीय बासिन्दाहरुको भिड नियन्त्रण गर्न बल प्रयोगको साथै गोली चलाएको थियो ।

के थियो घटना ?
आइतबार हराएकी बर्दिबास शुभम् चोक बस्ने ६ वर्षीया बालिका गुलाब साह खातुनको सोमबार राति शव फेला परेको थियो । शव फेला परेसँगै बन्धक बनाएर बलात्कारपछि हत्या गरेको आरोपमा किराना पसलका सञ्चालक २५ वर्षीय अरुण साह पक्राउ परे ।

मंगलबार बर्दिबास चोकमा बालिकाको शव राखेर स्थानीयले महेन्द्र राजमार्ग अवरुद्ध गरेर प्रदर्शन गरेपछि प्रहरीले बल प्रयोग गरेको थियो । भिडभाड नियन्त्रण गर्न दर्जनौं हवाई फायरसहित भीडमा गोली चलाएको थियो । प्रहरीको गोली लागेर संजय भनिने बुद्धिराज न्यौपाने, श्याम कार्की र अफताब आलम घाइते भए ।

घाइतेमध्ये न्यौपानेको गएराति उपचारका क्रममा ज्यान गएको छ भने श्याम कार्कीको काठमाडौंमा उपचार भइरहेको छ । त्यस्तै गोलीको छर्रा लागेका अफताब आलमको बर्दिबासमै उपचार भइरहेको प्रहरीले जनाएको छ । बालिकाको शव प्रहरीले पोस्टमार्टमका लागि प्रादेशिक अस्पताल जनकपुरमा मंगलबार साँझ ल्याइएको छ ।

प्रकाशित समय ०८:२३ बजे