मोरङको कटहरी गाउँपालिकाका बाढीपीडितले राहत रकम समयमै वितरण नगरिएको विरोधमा सडक अवरुद्ध गरेका छन् । गाउँपालिकाले राहत रकम समयमै वितरण नगरेका कारण फिर्ता भएको भन्दै पीडितले सडकमा बाँस तेस्र्याएर यातायात बन्द गरेका हुन् ।

गत वर्ष आएको बाढीले घरबारविहीन भएकाहरुको नाममा आएको रकम गाउँपालिकाले समयमै नबाँडेपछि फ्रिज भएर फर्किएको छ । राहतको रकम फिर्ता भएपछि बिहीबार दिउँसो पीडितहरुले सडक अवरुद्ध पारेका हुन् । कटहरी गाउँपालिकाका बाढीपीडितका लागि सरकारले ३ करोड ८९ लाख २५ हजार रुपैयाँ पठाएको थियो ।

गृह मन्त्रालयबाट आएको रकम असार ३२ गतेसम्म गाउँपालिकाले वितरण नगरेपछि रकम फ्रिज भएको हो । रकम फिर्ता भएपछि स्थानीयले केही दिनदेखि लगातार विरोधका कार्यक्रम गर्दै आएका छन् ।

प्रकाशित समय १७:५८ बजे