गृहपृष्ठ आकस्मिक कक्षमै नर्सको धर्ना !

आकस्मिक कक्षमै नर्सको धर्ना !

भक्तपुर-विगत सात महिनादेखि आन्दोलनरत मानव अंग प्रत्यारोपण केन्द्रका नर्सले आकस्मिक कक्षमै धर्नामा बसेका छन् ।

केन्द्रले आफूहरुमाथि अन्याय गरेकाले न्याय पाउनु पर्ने, बिनाआधार करार सेवाबाट निष्कासन गरिएकाले पुनःबहाली गर्नुपर्ने, करारमा रहेका सबैलाई स्थायी गर्नुपर्नेलगायतका माग राखेर आन्दोलनमा उत्रिएका नर्सले विगत चारदिनदेखि आकस्मिक कक्षमै धर्ना दिएका हुन् ।

केन्द्रले आज आयोजना गरेको पत्रकार सम्मेलनमा केन्द्रका निर्देशक डा पुकारचन्द्र श्रेष्ठले बिरामीको बहाना गरी चारदिनदेखि आकस्मिक कक्षमा बसेर त्रजिना जति र सजिना द्यौलाले आकस्मिक कक्षको दुरुपयोग गरेको बताए ।

उनले भने, “शुरुको दिन बेहोस भएँ भनेर आकस्मिक कक्षमा आएर बसेपछि यहाँका चिकित्सकले उपचारसमेत गरे, उपचारमा संलग्न चिकित्सकलाई समेत जथाभावी गालीगलौज गर्ने काम भयो, अहिले अवस्था ठीक छ, जानुस् भनेर डाक्टरले घर पठाउँदा पनि नगई आकस्मिक कक्षको शय्यामा बसेका छन्, यसले वास्तविक बिरामीलाई राख्ने ठाउँको अभाव भएको छ ।

आठवटा शय्या भएको केन्द्रको आकस्मिक कक्षको एउटा शय्यामा जति र द्यौला बसेका छन् । केन्द्रका निर्देशक डा श्रेष्ठले उनीहरुले आन्दोलन गरेर बाहिरका मानिस बोलाएर हुलहुज्जत गर्ने र धम्की दिएको आरोप लगाउँदै यहाँका कर्मचारीसमेत असुरक्षित भएको दाबी गरे ।

श्रेष्ठले भने, “करार सेवा नवीकरण नगरेको बहानामा गरिएको आन्दोलनका कारण योजना गरेभन्दा ५० वटा मिर्गौला प्रत्यारोपणमा कमी आएको छ, कलेजो प्रत्यारोपण र मुटुको शल्यक्रिया कार्यमा असर परेको छ, मलाई पाँच घण्टा कार्यकक्षबाट बाहिर जान नदिई मिर्गौला प्रत्यारोपण गर्नसमेत अवरोध पुर्याएका छन्, अहिले आकस्मिक कक्षको अनावश्यक प्रयोगले वास्तविक बिरामी मर्कामा परेकाले छिटो शय्या खाली गर्न अपिल गर्दछाँै ।”

यसबारेमा स्वास्थ्य मन्त्रालयले बनाएको छानबिन समितिको प्रतिवेदनका आधारमा करार सेवा नवीकरण गर्नुपर्ने कुनै आधार नभएको भन्ने व्यहोराको निर्देशनात्मक पत्र केन्द्रलाई पठाएको जानकारी गराए ।

केन्द्र स्थापना भएदेखि तीन महिने अस्थायी करारमा रहेका नर्स तथा कर्मचारीलाई स्थायी पदपूर्तिका लागि माग भई गएअनुसार लोकसेवाले स्थायी गर्न परीक्षा सञ्चालनको अन्तिम तयारी गरेको जानकारी आफूले पाएको पनि उनले बताए ।

आकस्मिक कक्षमा बसेका नर्समध्ये त्रजिना जतिको स्वास्थ्य अवस्थामा केही सुधार भए पनि अन्य अस्पतालमा लगेर उपचार गर्नुपर्ने केन्द्रका चिकित्सकले जानकारी दिएका छन् । सजिना द्यौलाको अवस्था भने सामान्य भइसकेको चिकित्सकको भनाइ छ ।

आकस्मिक कक्षमा बसेका नर्स जति र द्यौलाले उपचार र धर्ना दुवै भएको बताउँदै नेपाल नर्सिङ संघले धर्नामा बस्न भनेकाले बसेको बताए । द्यौलाले भनिन्, “हाम्रो उपचार र धर्ना दुवै हो, हाम्रो सबै समस्या र जिम्मेवारी नर्सिङ संघले लिएको छ, हाम्रो आन्दोलन जारी छ ।”

प्रकाशित समय १०:१६ बजे

प्रतिक्रिया दिनुहोस्

सम्बन्धित शीर्षकहरु