गृहपृष्ठ एनडीएको संसदीय दलको नेतामा मोदी सर्वसम्मत
एनडीएको संसदीय दलको नेतामा मोदी सर्वसम्मत
भारतीय जनता पाटी (भाजपा) तथा भाजपा नेतृत्वको नेसनल डेमोक्रेटिक अलाएन्सको संसदीय दलको नेतामा निवर्तमान प्रधानमन्त्री नरेन्द्र मोदी सर्वसम्मत चयन भएका छन् । भारतीय लोक सभा निर्वाचनमा बहुमत प्राप्त गरेपछि मोदीले शुक्रबार राष्ट्रपतिलाई भेट गरी राजीनामा दिएका थिए ।
भारतीय संसदीय परम्पराअनुसार बहुमत प्राप्त दलको संसदीय दलको नेतालाई प्रधानमन्त्री बन्नेछन् । त्यसका लागि निवर्तमान प्रधानमन्त्री मोदीलाई संसदीय दलको नेता चयन गरिएको भाजपा अध्यक्ष अमित शाहले जानकारी दिएका छन् ।
अप्रिल ११ देखि मे १९ सम्म गरी विभिन्न सात चरणमा लोकसभाको ५४२ सिटका लागि भएको निर्वाचनमा भाजपा एक्लैले ३०३ सिट जितेको छ । संसदमा बहुमत पुग्नका लागि २७२ सिटको आवश्यक पर्छ । भाजपाको नेतृत्वमा रहेको गठबन्धन एनडीएको लोकसभामा ३५० सिट पुगेको छ ।
लोकसभामा दोस्रो ठूलो दल भारतीय नेसनल कंग्रेस (कंग्रेस–आई) ले ५२ सिट जितेको भने उसको गठबन्धन युनाइटेड प्रोग्रेसिभ अलाएन्स (यूपीए) ले ८५ स्थानमा विजय हासिल गरेको छ । अन्य दल तथा स्वतन्त्रले १०७ ठाउँमा जितेका छन् ।
प्रमुख निर्वाचन आयुक्त सुनिद अरोराले शनिबार भारतीय राष्ट्रपति रामनाथ कोविन्दलाई भेट गरी निर्वाचन परिणामको औपचारिक जानकारी गराएका छन् ।
प्रकाशित समय २१:०२ बजे