अमेरिकी विदेश मन्त्री माइक पोम्पियोले सन् २००८ मा मुम्बईमा गरिएको आतंककारी हमलाका सम्बन्धमा पाकिस्तानको आलोचना गरेका छन् । २६ नोभेम्बरमा भएको त्यस घटनाको ११ वर्षसम्म पनि घटनामा संलग्न अपराधीलाई सजाय नहुँदा सारा विश्व आतंकित भएको पोम्पियोले बताए । सञ्चार माध्यमसँग कुरा गर्दै उनले हमलामा मारिएका ६ अमेरिकीसहित १६६ मृतकप्रति श्रद्धाञ्जली प्रकट गरे । पोम्पियोले थपे, ‘मुम्बई हमलाका योजनाकारलाई हालसम्म पनि सजाय नहुनु मृतका परिवारहरूका लागि दुःखको कुरा हो ।’

अमेरिकामा पाकिस्तानी दूतावास बाहिर मंगलबार अल्पसंख्यक समूहका कार्यकर्ताहरूले प्रदर्शन गरेका थिए । प्रदर्शनकारीहरू मुम्बई हमलामा इस्लामाबादको भूमिकाविरूद्ध आवाज उठाउन त्यहाँ पुगेका थिए । दैनिक भास्करका अनुसार प्रदर्शनमा सहभागीहरूले पाकिस्तानमा अल्पसंख्यकहरूलाई दबाइएको विषयमा पनि आवाज उठाए । उनीहरूका हातमा मुहाजिरहरूको नरसंहार रोक्न र बलुचिस्तानको स्वतन्त्रतासँग जोडिएका ब्यानर पनि थिए ।

अमेरिकी राष्ट्रपति डोनाल्ड ट्रम्पले गत वर्ष मुम्बई हमलाको वार्षिकीमा ट्वीट गरेका थिए । उनले लेखेका थिए, ‘मुम्बई आतंकबादी हमलाको दसौं वर्षमा न्यायका लागि अमेरिका भारतीयहरूसँगै छ । हामी कहिल्यै पनि आतंककारीलाई विजय हुन दिन्नौं ।’

२६ नोभेम्बर २००८ मा १० जना आतंककारी कराचीबाट सामुद्रिक मार्ग हुँदै मुम्बई पुगेका थिए । उनीहरूले छत्रपति शिवाजी टर्मिनल, ताज होटल, ओबेराय ट्राइडेन्ट होटल र नरिमन हाउसमा आक्रमण गरेका थिए ।  यस आक्रमणमा २८ विदेशीसहित १६६ मानिस मारिएका थिए । करिब ६० घण्टाको मुठभेडमा एक आतंककारी कसाबलाई जिउँदै समातिएको थियो ।

प्रकाशित समय १०:३७ बजे