ओमनका राजा काबूस बिन सइदको मृत्यु भएपछि नयाँ राजाको रुपमा सुल्तान हैतम बिन तरिकलाई घोषणा गरिएको छ । ओमनको शाही परिवार परिषदले हैतम बिन तारिक बिन तैमुर अल सइदलाई नयाँ सुल्तान हुने फैसला गरेको हो ।

सुल्तान हैतम बिन तरिक १९५४ मा जन्मिएका हुन् । यसअघि उनी ओमनका सम्पदा तथा संस्कृति मन्त्री थिए । नयाँ सुल्तान हैतम बिन तारिक दिवंगत सुल्तान काबूसका काकाका छोरा हुन् ।

नयाँ सुल्तान हैतमले दिवंगत सुल्तान काबूसको विशेष दूतको रुपमा विभिन्न अवसरमा काम गरेका थिए । उनले ओमनको विदेश मन्त्रालयमा विभिन्न पदमा रही सेवा गरिसकेका छन् ।

नयाँ सुल्तान हैतमले ओमनको विदेश मन्त्रालयमा अण्डरसेक्रेटरीको रुपमा १९८६ देखि १९९४ सम्म काम गरिसकेका छन् । त्यसपछि उनी सोही मन्त्रालयमा सेक्रेटरी जनरल पदमा नियुक्त भए ।

यो पदमा रहेर उनले १९९४ देखि २००२ सम्म काम गरे । १९७९ मा बेलायतको अक्सफोर्ड युनिभर्सिटीका वैदेशिक सेवा विषयका ग्रयाजुएट सुल्तान हैतम ओमन फुटबल संघका प्रथम अध्यक्ष पनि थिए । उनलाई खेलप्रति लगाव भएका व्यक्तिको रुपमा पनि चिनिन्छ । (एजेन्सी)

प्रकाशित समय १६:५९ बजे