विश्वव्यापी रुपमा फैलिएको नोबेल कोरोना भाइरसका कारण धेरै देशहरुले दिनहुँ हजारौं नागरिक गुमाइरहेका छन् । शुक्रबार बिहानसम्म अमेरिकालगायतका १० देशले ठूलो संख्यामा मानवीय क्षति भोग्नु परेको छ ।

सबैभन्दा अमेरिकामा प्रत्येक दिनजसो दुई हजारभन्दा बढीको ज्यान गइरहेको छ । शुक्रबार बिहानसम्म अमेरिकामा ज्यान गुमाउनेको संख्या ३४ हजाार ६१७ पुगेको छ । गएको २४ घण्टामा दुई हजार १७४ जनाले ज्यान गुमाएका छन् ।

अहिलेसम्म अमेरिकामा छ लाख ७७ हजार ५७० जनामा संक्रमण देखिएको छ । गएको २४ घण्टामै २९ हजार ५६७ जनामा नयाँ संक्रमण देखिएको विश्व स्वास्थ्य संगठनले जनाएको छ । त्यस्तै ५७ हजार ५०८ जनाको सफल उपचार भएको छ ।

अमेरिकापछि ठूलो संख्यामा मानवीय क्षति भोगेको इटालीमा २२ हजार १७० को ज्यान गइसकेको छ भने एक लाख ६८ हजार ९४८ जनामा संक्रमण देखिएको छ । त्यस्तै स्पेनमा १९ हजार ३१५ जनाको ज्यान गएको छ भने एक लाख ८४ हजार ९४८ जनामा संक्रमण देखिएको छ । अहिलेसम्म स्पेनमा ७४ हजार ७९७ जनाको भने सफल उपचार भएको छ ।

फ्रान्समा १७ हजार ९२० जनाको ज्यान गएको छ भने एक लाख ६५ हजार २७ जनामा कोरोना संक्रमित देखिएका छन् । त्यस्तै जर्मनीमा पनि कोरोनाको ठूलै प्रकोप देखिएको छ । अहिलेसम्म एक लाख ३७ हजार ६९८ जनामा संक्रमण देखिएको छ भने चार हजार ५२ जनाको ज्यान गइसकेको छ ।

युकेमा अहिलेसम्म ज्यान गुमाउनेको संख्या १३ हजार ७२९ पुगेको छ । एकै दिनमा साढे आठ सयभन्दा बढीको ज्यान गएको विश्व स्वास्थ्य संगठनले जनाएको छ । युकेमा एक लाख तीन हजार ९३ जनामा संक्रमण देखिएको छ ।

सबैभन्दा पहिले फैलिएको चीनमा भने नयाँ संक्रमण देखिएको छैन । सुरुमा ८२ हजारमा देखिएको कोरोना अहिले पनि त्यही संख्यामा देखिएको छ । थप देखिएको छैन । त्यस्तै तीन हजार ३४२ को ज्यान गएको भने ७७ हजार ८९२ जनाको सफल उपचार भएको छ । त्यस्तै इरान, टर्की, बेल्जियम, ब्राजिल, क्यानडा, नेदरल्यान्डजस्ता मुलुकहरुमा ज्यान गुमाउनेको संख्या हजारौं पुगेको छ भने लाखौंको हाराहारीमा संक्रमित देखिएका छन् ।

प्रकाशित समय १०:२० बजे