न्युजिल्यान्डको नवगठित सरकारले कोरोनाबाट बढी प्रभावित साना व्यवसायीका लागि विशेष राहत कार्यक्रम घोषणा गरेको छ । लेबर पार्टीको सरकारको पहिलो मन्त्रिपरिषद बैठकले साना व्यवसायीलाई उठाउन बलियो सहयोगका कार्यक्रम अघि सारेको हो ।

साना व्यवसायी राज्यको अर्थतन्त्रको महत्वपूर्ण अंश भएकाले उनीहरुलाई सहयोग गरे देशको अर्थतन्त्र पनि जोगिने डच सरकारको ठहर छ । ‘मन्त्रिपरिषद बैठकले साना व्यवसायीका लागि राहत प्याकेज दिने निर्णय गरेको छ, यसअघि दिँदै आएका सहुलियतहरूको म्याद पनि थप गरिएको छ,’ प्रधानमन्त्री जसिन्दा अर्डेनले भनिन् ।

मन्त्रीपरिषद् बैठकपछि सम्बोधनका क्रममा उनले यो वर्ष म्याद सकिन लागेका राहत तथा सहुलियतका कार्यक्रम सन् २०२३ को डिसेम्बर ३१ सम्म जारी रहने बताइन् । कोरोनाका कारण मर्कामा परेका साना व्यवसायीलाई एक वर्षदेखि दुई वर्षसम्म ब्याज मिनाहा सहुलियत दिइने निर्णय भएको प्रधानमन्त्रीले जानकारी गराइन् । ‘जसरी कोरोनाभाइरस महामारी डिसेम्बरसम्म सकिँदैन, त्यसरी नै हाम्रो राहत प्याकेजले पनि निरन्तरता पाउँछ,’ उनले व्यवसायीलाई आश्वस्त रहने आग्रह गर्दै भनिन् ।

फरक व्यवसायलाई फरक समय र अवस्थाको राहत प्याकेज चाहिने भएकाले त्यही अनुसारको व्यवस्था गरिएको प्रधानमन्त्री अर्डेनले जानकारी दिइन् । कठिन समयमा व्यवसायीलाई सरकारले पछाडिबाट सपोर्ट गर्नु नै महत्वपूर्ण हुने उनले बताइन् । ‘अर्थतन्त्रलाई पुनरुत्थान गर्नु सरकारको प्राथमिकता हो, त्यसका लागि साना व्यवसायीलाई बचाउनु पुनरुत्थानका लागि मुख्य उपाय हो,’ उनले भनिन् ।

न्युजिल्यान्डमा हालै भएको निर्वाचनपछि गठन भएको सरकारका मन्त्रीहरुले शुक्रबार सपथग्रहण गरेका छन् । त्यसपछि सोमबार पहिलो बैठक बसेको हो । निर्वाचनअघि पनि सरकारको नेतृत्व गरेकी अर्डेनले कोरोनाभाइरस महामारी व्यवस्थापनका लागि प्रभावकारी, परिपक्व र जिम्मेवार भूमिका खेलेको ठानेर अहिलेको निर्वाचनमा अझ धेरै जनमत पाएकी हुन् ।

प्रकाशित समय ०७:०० बजे