चिसो समयमा अमेरिकामा कोरोना महामारीले झनै विकराल रूप लिनसक्ने चिन्ता स्वास्थ्य क्षेत्रका विज्ञहरूले बताएका छन् । अमेरिकाले महामारीको सम्भावित थप विकराल अवस्थालाई सामना गर्न सक्ने चेतावनी विज्ञहरूले दिएका छन् ।

अमेरिकीहरू जाडोमा बिदामा बस्ने र पारिवारिक जमघटका साथै लामो समय घरमै बस्ने गर्छन् । यो समयमा काभिड १९ नियन्त्रणका उपायहरू अवलम्बन नभएको, जाडो बढेको र पारिवारिक जमघटका लागि टाढाटाढाबाट परिवारका सदस्यहरू घर फर्किने भएकोले सङ्क्रमण थप फैलिने खतरा रहेको विज्ञहरूलाई उद्धृत गर्दै अमेरिकी पत्रिका द गार्डियनले लेखेको छ । ‘एक शब्दमा भन्दा अमेरिकामा महामारी कम हुने आधार ‘आशा’ मात्रै हो, रणनीतिक तयारी भएको पाइँदैन,’ जर्जियास्थित इमोरी स्कुल अफ मेडिसिन तथा ग्रान्डी हेल्थ सिस्टमका सहायक डिन कार्लोस डेल रियोले भनेका छन् ।

उनले अमेरिकामा दैनिक दुई लाख कोभिड १९ संक्रमित हुने अनुमान गर्दै यो अवस्थामा पनि अमेरिकी जनस्वास्थ्य सेवा प्रणालीले धानेमा आश्चर्य मान्न नपर्ने बताए । अमेरिकाको महामारीको अवस्था आगामी दुई महिनामा देख्न सकिने विज्ञहरूको भनाइ छ । अमेरिकामा अहिलेसम्म १ करोड ४ लाखभन्दा मानिस संक्रमित भएको र दुई लाख ४४ हजार ४४८ संक्रमितको मृत्यु भएको जोन हकिन्स विश्वविद्यालयले जनाएको छ ।

प्रकाशित समय ०७:४६ बजे