गृहपृष्ठ १७ हजार कर्मचारीले बुझाएनन् सम्पत्ति विवरण
१७ हजार कर्मचारीले बुझाएनन् सम्पत्ति विवरण
देशभरि विभिन्न निकायमा नियुक्त भएका वा निर्वाचित पदाधिकारी १७ हजारले सम्पत्ति विवरण नबुझाएपछि तिनीहरूमाथि ५ हजारका दरले जरिवाना हुने भएको छ ।
राष्ट्रिय सतर्कता केन्द्रले हालै सार्वजनिक गरेको ‘सम्पत्ति विवरण अनुगमन प्रतिवेदन’ अनुसार आर्थिक वर्ष २०७५/६७ मा देशभरि कार्यरतमध्ये १७ हजार १८५ जनाले सम्पत्ति विवरण बुझाएनन् । यीमध्ये नेपाली सेनाका ४६० र नेपाल प्रहरीका १११ जना छन् ।
उनीहरूमाथि भ्रष्टाचार निवारण ऐन, २०५९ को दफा ५० बमोजिम ५ हजार जरिवानाका लागि अख्तियार दुरुपयोग अनुसन्धान आयोगमा लेखी पठाइएको राष्ट्रिय सतर्कता केन्द्रले जनाएको छ ।
प्रतिवेदनअनुसार सम्पत्ति विवरण नुबझाउनेमा संघीय सरकारमातहत १२ हजार १३३ जना, प्रदेश सरकारमातहतका ५५४ जना र स्थानीय तहमातहतका ४ हजार ४९८ जना छन् ।
सार्वजनिक पदमा बहाल रहेका सुरु नियुक्तिको ६० दिनभित्र र हरेक आर्थिक वर्षमा कानुन बमोजिम सम्पत्ति विवरण पेश गर्नुपर्ने व्यवस्था भए पनि हरेक वर्ष औसत ७ हजार जनाले नै अटेरी गरेर सम्पत्ति विवरण नबुझाएको केन्द्रको प्रतिवेदनमा उल्लेख छ ।
आव २०७४/७५ मा पनि १७ हजार १२७ जनाले सम्पत्ति विवरण बुझाएका थिएनन । यद्यपि, सम्पत्ति विवरण बुझाउनेको संख्यामा वृद्धि भएको सतर्कता केन्द्रले जनाएको छ ।
एउटा स्थानीय तहले पटक पटक पत्राचार एवं फोन सम्पर्क गर्दा समेत सम्पत्ति विवरण बुझाए/नबुझाएको अभिलेख सम्बन्धी तथ्यांक अनलाइन सफ्टवेयरमा तथ्यांक प्रविष्टि नगरेको एवं पत्र मार्फत समेत जवाफ नदिएकाले त्यो स्थानीय तहमाथि कारबाही गर्न अख्तियार दुरुपयोग अनुसन्धान आयोगमा सिफारिस गरिएको प्रतिवेदनमा उल्लेख छ । सतर्कता केन्द्रले स्थानीय तहको नाम भने खुलाएको छैन ।
सतर्कता केन्द्रका अनुसार स्वास्थ्य तथा जनसंख्या मन्त्रालयअन्तर्गतका ९७ निकायमा कार्यरत कर्मचारीको सम्पत्ति विवरणको तथ्यांक प्रविष्टि भएको नदेखिएकाले एकमुष्ट रुपमा कारवाही गर्नका लागि अख्तियारमा सिफारिस गरिएको छ ।
सम्पत्ति विवरण नबुझाउनेहरूः
| नबुझाउनेको संख्या | कैफियत | |
| १.१ निजामती कर्मचारी | २५०४ | |
| १.२ नेपाली सेना | ४६०० | ४६० जना विदेशमा रहेका |
| १.३ नेपाल प्रहरी | १११ | |
| १.४ विद्यालय शिक्षक कितावखाना | ७६२६ | |
| १.५ अन्य (नं.१.१-१.४ बाहेक) | १४३२ | |
| जम्मा | 1१२१३३ | |
| प्रदेश तह | ५५४ | |
| स्थानीय तह (पालिका) | ४४६३ | |
| स्थानीय तह (जि.स.स.) | ३५ | |
| कूल जम्मा | १७१८५ |
प्रकाशित समय १३:०८ बजे

















