गृहपृष्ठ बामदेवलाई ओलीको जवाफ- मिल्ने भए दुई प्रधानमन्त्री बनाउँथें

बामदेवलाई ओलीको जवाफ- मिल्ने भए दुई प्रधानमन्त्री बनाउँथें

kp oli_newskarobar फाइल तस्बिर

प्रधानमन्त्री एवं नेपाल कम्युनिस्ट पार्टी (नेकपा)का अध्यक्ष केपी शर्मा ओलीले आफ्नै पार्टीका नेता बामदेव गौतमले दुई अध्यक्षबीच फाटो ल्याउने प्रयास गरेको आरोप लगाएका छन् । पार्टी सचिवालय सदस्य वामदेव गौतमको नाम नलिई उनीप्रति संकेत गर्दै ओलीले सो धारणा राखेका हुन् ।

शनिबार सुरु स्थायी समिति बैठकमा गौतमले एउटा मात्र अध्यक्ष बनाउनुपर्ने प्रस्ताव राखेका थिए । भोलिपल्ट आईतबार सार्वजनिक कार्यक्रममा ओलीले त्यसको जवाफ दिँदै मिल्ने भए आफू २ जना अध्यक्ष मात्र नभई प्रधानमन्त्रीसमेत दुई जना बनाउने पक्षमा रहेको बताए । ओलीले भने, ‘दुइटा अध्यक्षको अभ्यास हेर्नुस् कसरी अगाडि बढ्छ । संविधानले मिल्दैन, नत्र दुईटा प्रधानमन्त्री पनि बनाउन हुन्थ्यो ।’

पूर्व नेकपा (एमाले) निकट प्रगतिशील तथा पेशागत कानुन व्यावसायी महासंघ (पिपिएलए) र नेकपा (माओवादी केन्द्र) निकट गणतान्त्रिक तथा प्रगतिशील कानुन व्यवाशायी संघ(आरपिएलए)को एकिकरणलाई पार्टी केन्द्रीय कार्यलय धुम्बाराहीमा सम्बोधन गर्दै ओलीले उक्त कुरा बताएका हुन् ।

अध्यक्षबीच फाटो ल्याउन एक अध्यक्ष ले पार्टीको र अर्कोले सरकारको जिम्मेवारी दिनुपर्ने प्रस्ताव आएको बताए । उनले भने, ‘त्यहाँ लडाइँ झगडा लगाउन सकिन्छ कि ? कुर्सी परपर सार्न सकिन्छ कि ? प्रयास त्यो हो ।’ प्रधानमन्त्री ओलीले सफलता तर्फ अघि बढीरहेको सरकारका विरुद्ध अनेक किसिमका दुस्प्रचार गरिएको बताए ।

कम्युनिस्ट पार्टीले बहुमत जनताको अभिमतबाट, बहुमत प्रतिनिधिले अनुमोदन गरेर बनाएको सरकारलाई केही केहीलाई प्रिय नलाग्ने भए पनि यसले आम जनताको हितमा नै काम गर्ने उनको भनार्इ थियो । ‘प्रचार युद्धमा गणतन्त्रका धरोहरहरुलाई आक्रमण गरिएको छ । राष्ट्रपतिका विषयमा अनावश्यक दुस्प्रचार छ,’ प्रधानमन्त्री ओलीले भने, ‘यो कुनै व्यक्ति विशेष नभएर गणतन्त्रलाई नै धराशायी बनाउने योजनामा केन्द्रित छ ।’

दुई संगठनको एकीकरणबाट नेपाल कानुन व्यावशायी संगठन (एनएलए) को गठन गरिएको छ । संगठनको संयोजकमा रुद्र नेपाल र सहसंयोजकमा दिनमणी पोख्रेल सहित ४५ सदस्यीय समिति  चयन  भएको छ ।

प्रकाशित समय १७:४७ बजे

प्रतिक्रिया दिनुहोस्

सम्बन्धित शीर्षकहरु