यातायात व्यवस्था विभागले यातायात क्षेत्रमा भएको सिण्डीकेट रोकेसंगै भाडा व्यवस्थापनको काम थालेको छ । सवारी साधनहरुले मनपरी भाडा लिएर यात्रुलाई ठगी गरिहेको भन्ने जनगुनासो आएपछि विभागले यस्तो तयारी गरेको हो ।
आगामी आर्थिक वर्षदेखि लागू हुने गरी सबै सावारी साधानले अनिवार्य ई टीकेटिङको व्यवस्था गर्न लागेको विभागले जनाएको छ । विभागका अनुसार सबै राजमार्गसहित स्थानीय रुटमा समेत ई टीकेटिङको व्यवस्थान गर्न लागिएको हो । विभागका महानिर्देशक रुपनारायण भट्टराईका अनुसार मुलुकभरका सबै रुटहरुको व्यवस्थापन गर्न स्थानीय तहसंग सहकार्य गर्ने र सोही अनुसार व्यवस्थापन गरिनेछ ।
स्थानीय सरकारको सहकार्यमा विभागले स्थानीय तहभित्र सञ्चालनमा आउने सवारीको व्यवस्थापनसहित टिकेटिङमा समेत स्थानीय तहलाइृ जिम्मेवारी दिने विभागको तयारी छ । योसंगै स्थानीयस्तरको सबै सवारीको व्यवस्थापन स्थानीय सरकारले गर्नेछ ।
‘हामीले ई टिकेटिङमा जाने योजना बनाइसकेका छौं । त्यसैले ई टिकेटिङमा जाने बित्तिकै कसैले पनि एक रुपैयाँ पनि बढी भाडा लिन सक्दैन र मिल्दैन पनि,’ विभागका महानिर्देशक भट्टराईले भने, ‘सरकारले तोकेको भाडामा टिकट काटेपछि बढी भाडा लिने भन्ने सवालै हुँदैन ।’

विभागले यातायात व्यवासयीहरुलाई समेत नयाँ प्रविधिको प्रयोग गर्नेतर्फ आग्रह गरेको छ । सिण्डकेट तोड्ने सहमति गरेकै समयमा विभागले व्यवसायीहरुलाई टिकेटिङका विषयमा समेत सहमति गराएको महानिर्देशक भट्टराईले जानकारी दिए ।
सवारी साधानमा यात्रुलाई लिइएको भाडाको विषयमा विभागले अनुगमनको संयन्त्रसमेत बनाउने तयारी गरेको छ । विभागले अनुगमनलाई प्रभावकारी बनाउन योजना बनाइरहेको छ । ‘हामीले नियमनलाई पनि प्रभावकारी बनाउने योजना गरिरहेका छौं,’ उनले भने, ‘तत्काल बढी भाडा लिने छोटो दुरीका सवारीहरूलाई पनि कारबाही गरिसकेका छौं ।’

प्रकाशित समय ०७:२८ बजे