शुक्रबारदेखि सुरु हुने कर्णाली प्रदेशको हिउँदे अधिवेशन अवधिभर एकदर्जन बढी विधेयक पेश हुने भएका छन् । अधिवेशन अवधिभर १३ वटा विधेयक संसद बैठकमा पेश हुने भएका हुन् ।

कर्णाली प्रदेशसभाका सचिव जिवराज बुढाथोकीका अनुसार बजेट अधिवेशनजस्तो सरकारलाई काम नभए पनि विधेयकको काम यो अधिवेशनमा हुनेछ । बैठकको मुख्य एजेण्डाको रुपमा विधेयक रहे पनि विभिन्न अवधिमा सांसदहरुले नागरिकको आवाजसमेत उठाउने उनले बताए ।

कर्णाली प्रदेशसभाको १३ वटा सम्भावित विधेयकहरुमा ३ वटा मन्त्रालयका विधेयक रहेको उनले जानकारी दिए । भूमि व्यवस्था, कृषि तथा सहकारी मन्त्रालयका ५ वटा, सामाजिक विकास मन्त्रालयका ३ वटा र उद्योग, पर्यटन, वन तथा वातावरण मन्त्रालयका ५ वटा दर्ता हुने सम्भावित विधेयक हुन् ।

कर्णाली प्रदेश जलचर विधेयक २०७६, जीवनाशक विषादी नियन्त्रक विधेयक २०७६, कृषि तथा पशुपक्षीजन्य व्यवसाय प्रवद्र्धन विधेयक २०७६, माटो तथा मल व्यवस्थापन विधेयक २०७६ र पशु वधशाला तथा मासु जाँच विधेयक २०७६ भूमि व्यवस्था, कृषि तथा सहकारी मन्त्रालयमार्फत आउने उनले बताए ।

त्यस्तै , सामाजिक विकास मन्त्रालयमातहत आउने तीनवटा विधेयकमा प्रदेश युवा परिषद्को सम्बन्धमा व्यवस्था गर्न बनेको विधेयक २०७६, बालबालिकाको अधिकार संरक्षण सम्बन्धमा व्यवस्था गर्न बनेको विधेयक २०७६ र पर्वतीय विज्ञान तथा प्रविधि विश्वविद्यालय सम्बन्धमा व्यवस्था गर्न बनेको विधेयक २०७६ रहेका छन् ।

उद्योग, पर्यटन, वन तथा वातावरण मन्त्रालय अन्तर्गतका पाँचवटा विधेयकमा कर्णाली प्रदेश वातावरण संरक्षणसम्बन्धी विधेयक २०७६, कर्णाली प्रदेश वनसम्बन्धी विधेयक २०७६, कर्णाली प्रदेश वाणिज्यसम्बन्धी विधेयक २०७६, कर्णाली प्रदेश औद्योगिक व्यवसायसम्बन्धी विधेयक २०७६ र कर्णाली प्रदेश पर्यटनसम्बन्धी विधेयक २०७६ रहेको उनले जानकारी दिए ।

अधिवेशन अवधिमा के गर्ने भन्ने विषयमा विभिन्न समितिका अध्यक्षसँग बैठक बसी छलफलसमेत गर्ने बुढाले बताए । बैठकमा भने दलको तर्फबाट दलका एक/एक जना नेताले बोल्ने तयारी भएको उनले बताए । ‘बैठक तीनबजे सुरु हुँदैछ । अधिवेशनको पहिलो दिन भएकाले खासै एजेण्डा छैनन्,’ उनले भन ।

उनले कार्यव्यवस्था समितिको बैठक आगामी २९ गते बस्ने र अधिवेशनको दोस्रो बैठक भने फागुन १ गते बस्ने तयारी भएको उनले जानकारी दिए । बुढाले केही विधेयकहरु विचाराधीन अवस्थामा रहेको समेत जानकारी दिए ।

प्रकाशित समय १९:०३ बजे