विश्वव्यापी महामारीको रुपमा फैलिएको कोरोना भाइरसको संक्रमणबाट जोगिनका लागि सतर्कता अपनाउन सरकारले आग्रह गरेको छ । आइतबार बसेको सर्वपक्षीय बैठकबाट पोखरा महानगरपालिकाले पनि चैत २१ गतेसम्मका लागि अत्यावश्यक बाहेकका सबै सेवा बन्द गर्ने निर्णय गरेको छ ।

शैक्षिक संस्था, कार्यालय, लामो दुरीका यातायात सेवासमेत बन्द भइसकेका छन् । विद्यालय र कार्यालयहरु बन्द हुँदा फुर्सदिला बनेका सर्वसाधारणहरु धमाधम गाउँतिर लागिरहेका छन् । कोरोना भाइरसका कारण त्रास बढेसँगै बजारमा कृत्रिम अभाव सिर्जना भइरहेको हुँदा पनि मानिसहरु गाउँतिर लाग्ने क्रम जारी छ ।

अहिलेसम्म पोखरा छाड्नेहरुको संख्या झन्डै पचास हजार पुगेको जिल्ला ट्राफिक कार्यालयका प्रमुख इन्स्पेक्टर सन्तोष रोकाले बताए । उनका अनुसार शुक्रबारयता तीन दिनभित्र पोखराबाट साना-ठूलासहित १६ सय सवारीसाधन बाहिरिएका छन् । पोखराका विभिन्न नाकाहरु छोरेपाटन, जहुँबारी, तालचोक हुँदै मानिसहरु बाहिरिने क्रम जारी रहेको उनले बताए ।

पोखरा भित्रिने मानिसहरुको संख्या भने न्यून छ । पोखराका पृथ्वीचोक, न्यूरोड, महेन्द्रपुल, पालिखेचोक, चाउथे लगायतका माानिसको चहलपहल बढी हुने स्थानहरु सुनसान छन् । सरकारले २५ जनाभन्दा बढी जमघट नहुन आग्रह गरेसँगै मानिसहरुको चहलपहल घटेको हो ।

कुनै पनि अफवाहको पछि नलाग्न, आवश्यक सचेतना अपनाउन, भीडभाडमा नजान, खाद्यन्न, ग्यास, पेट्रोलियम पदार्थको कृत्रिम अभाव सिर्जना नगर्न/नगराउन तथा संक्रमण रोकथामका लागि सबैले हातेमालो गर्न स्थानीय प्रशासनले अनुरोध गरेको छ ।

प्रकाशित समय १४:१६ बजे