अन्तर्राष्ट्रिय अन्तरिक्ष स्टेसन (आइएसएस) का कुनै पनि शौचालयले काम नगरेको नासाले बुधबार जानकारी दिएको छ । शौचालय बिग्रेपछि अन्तरिक्ष यात्रीहरूले विकल्पमा डाइपरको उपयोग गर्दै छन् । आइएसएसका कमान्डर लुसा परमिटानोका अनुसार अमेरिकाको भागमा रहेको शौचालयले लगातार खराब भएको संकेत गरेको छ । रूसको शौचालय पनि पूरै क्षमतासम्म भरिएकाले यसका उपयोग हुन सक्दैन ।

अन्तर्राष्ट्रिय अन्तरिक्ष स्टेसनमा रूसमा निर्मित दुई शौचालय जडान गरिएको छ । एउटा शौचालय अमेरिकको भागमा लगाइएको छ भने अर्को रूसको भागमा जडान गरिएको छ । यी दुईबाहेक अन्तरिक्ष स्टेसनमा जोडिएको सोयुज अन्तरिक्ष यानमा पनि शौचालय छ तर त्यसको प्रयोग अन्तरिक्ष यानले उडान गर्दा मात्र गरिन्छ । स्थिर रहेका समयमा यस शौचालयको प्रयोग कहिलेकाहीँ मात्र हुन्छ ।

अमरउजालाका अनुसार हिजोआज अन्तरिक्षमा दुई अन्तरिक्ष स्टेसनमा काम हुँदै छ । तीमध्ये एउटा अमेरिका, रूस, युरोपीय संघ, कनाडा र जापानको सहयोगमा सञ्चलित छ । यसलाई ‘अन्तर्राष्ट्रिय स्पेस स्टेसन’ (आइएसएस) का नामबाट चिनिन्छ । अर्को अन्तरिक्ष स्टेसन ‘तिआनगोङ-२’ चीनको हो । आईएसएसलाई पृथ्वी तल्लो कक्षमा स्थापित गरिएको छ । यसले निरन्तर पृथ्वीको परिक्रमा गर्छ । यसअघि रूसको अन्तरिक्ष स्टेसन ‘मिर’ ले पृथ्वीको परिक्रमा गर्थ्यो । यसको सञ्चालन खर्च अति धेरै र सुरक्षाका कारण सन् २००१ मा दक्षिण प्रशान्त महासागरमा खसालिएको थियो ।

प्रकाशित समय ११:२८ बजे