गृहपृष्ठ स्थान अपुग भएपछि सर्ने भयो श्रम कार्यालय
स्थान अपुग भएपछि सर्ने भयो श्रम कार्यालय
सीप विकास केन्द्रमा जाने निश्चित
बुटवलको चाँदबारीमा गत पुस १५ देखि सञ्चालनमा आएको श्रम तथा रोजगार कार्यालय साँघुरो ठाउँमा राखिएको कारण सेवाग्राहीहरुले पटक-पटक सेवा लिन अफ्ठारो भएको गुनासो गर्दै आएका थिए ।
लाईन लाग्न समेत नमिल्ने गरी राखिएको श्रम कार्यालयको सेवाग्राहीहरुले पटक-पटक गुनासो गर्दै आएका थिए । फागुन २७ गते संघीय सरकार श्रम रोजगार तथा सामाजिक विकासमन्त्री गोकर्णराज विष्टले छड्के अनुगमन गरेका छन् । अनुगमनको क्रममा सेवा ग्राहीबाट नै मन्त्रीलाई गुसानो आएको थियो ।
तत्काल यो स्थानबाट सार्न सेवाग्राहीले पटक-पटक आग्रह समेत गरेका थिए ।
छड्के निरीक्षणको क्रममा रहेका मन्त्रीले अनुगमनपश्चात अबको ५ दिनभित्र कार्यालय उचित स्थानमा सार्न निर्देशन दिएका छन् । निरीक्षणपश्चात उनले कार्यालयमा रहेका निमित्त कार्यालय प्रमुख बालकृष्ण थापा लगायतको टोलिलाई उक्त निर्देशन दिएका हुन् ।
मन्त्री विष्टले भने, ‘यो स्थान सेवाग्राहीहरुको लागि उचित देखिएन, त्यस कारण ५ दिनभित्रमा नै कार्यालय उचित स्थानमा सार्नको लागि आग्रह गरिएको हो ।’
मन्त्री विष्टका स्वकीय सचिव मदन खनाललका अनुसार सेवा ग्राहीबाट समेत पटक-पटक उचित स्थानमा श्रम कार्यालय राख्न आग्रह गरिएको गुनासो आएको थियो ।
श्रम कार्यालय बुटवलका कार्यालय प्रमुख उमेश शर्मा बिरामी भएको कारण विदामा थिए । कर्यालयमा रहेका निमित्त कार्यालय प्रमुख बालकृष्ण थापाले पनि साँघुरो ठाउँ भएको कारण समस्यामा परेको बताएका थिए ।
निमित्त कार्यालय प्रमुख बालकृष्ण थापाका अनुसार मन्त्रीज्युको निर्देशन अनुसार ५ दिनभित्र कार्यालय सार्न सम्भव नभए पनि कार्यालय सर्ने निश्चित भएको जानकारी दिए ।
कुराकानीमा उनले हाल भाडाको घरमा रहेको, पार्कीङ्ग सुविधा नभएको साथै सेवाग्राहीहरु समेत लाईनमा बस्न नसक्ने स्थान भएकै कारण आफूहरुले पनि सार्ने प्रक्रियामा रहेको बताए ।
उनले व्यवसायिक तथा सीप विकास केन्द्रको एउटा भवन अहिले खाली रहेको कारण उक्त कार्यालय स्थानमा समेत निरीक्षण गरी कर्यालय सार्न उचित हुने देखिएको थापाले जानकारी दिए । भाडाको घरभन्दा सरकारी भवन प्रयोग गर्न पाउँनु आफैमा राम्रो पक्ष भएको समेत उनले बताए ।
प्रकाशित समय १४:२७ बजे