कञ्चनपुरकी १३ वर्षीया बालिका निर्मला पन्तको हत्यापछि प्रमाण नष्ट गरेको आरोप लागेका तत्कालीन एसपी दिल्लीराज विष्टलाई धरौटीमा छाड्न अदालतले आदेश दिएको छ । कञ्चनपुर जिल्ला अदालतले उनलाई साढे १० लाख धरौटीमा रिहा गर्न आदेश दिएको हो ।

विष्टलाई अभियुक्तलाई यातना दिएको आरोपमा ६ लाख र प्रमाण नष्ट गरेको आरोपमा साढे ४ लाख रुपैयाँ धरौटी माग गरिएको कञ्चनपुर जिल्ला अदालतका रजिष्ट्रार हरिकृष्ण अवस्थीले जानकारी दिए । न्यायाधीश राजेन्द्रकुमार आचार्यको इजलासले बिष्टसँग १० लाख धरौटी माग्ने आदेश गरेको हो ।

एसपी विष्टसहित ८ जना प्रहरी अधिकारीविरुद्ध निर्मला हत्या प्रकरणको प्रमाण नष्ट गरेको र घटनाका आरोपी मानिएका दीलिपसिंह विष्टलाई यातना दिइएको भन्दै मुद्दा दायर भएको थियो । निर्मलाको गत साउनमा बलात्कारपछि हत्या भएको थियो । तर अहिलेसम्म दोषी पक्राउ पर्न सकेको छैन ।

प्रकाशित समय १३:४२ बजे