पाटनको नःबहाल टोलका ८९ वर्षीय काजीरत्न ताम्रकारको मन बिहानदेखि बेचैन थियो । कान कम सुन्ने उनी घरी मूलढोकातिर नजर दौडाउंथे, घरी छोरी, बुहारीको अनुहार नियाल्थे । एकदिन अगाडि छोरी हिराकुमारीले ताम्रकार समाजबाट विगतका वर्षहरुमा जस्तै जेष्ठ नागरीक घरभेटका लागी समाजको टोली घर आउंदैछ भन्ने सूचना दिएदेखि उनको आंखामा उत्साह छाएको थियो । घर ७२ सालको महाभूकम्पमा परी क्षतिग्रस्त भएदेखि वारीमा टहरा बनाएर बसेका उनलाई भेट्न समाजको टोली करीब ११ बजेतिर छिर्यो । हंसिलो अनुहारले सबैलाई आशिष प्रदान गर्दै उनले स्वागत गरे । समाजका सदस्यहरुले उनको हालखबर सोधे, स्वास्थ्य परिक्षण गरे, सुखदुखका कुरा गरे, समाज तथा दाताहरुले उपलब्ध गराएको उपहार दिए । यति हुँदासम्म उनको मुहारमा असिम आनन्दको अनुभव झल्कंदै थियो । समाजबाट आएका सदस्यहरुलाई मुरीमुरी धन्यवाद दिंदै उनले सबैलाई चिया खाएर मात्र जान अनुरोध गरे ।
ताम्रकार समाजको जेष्ठ नागरीक उपसमितिबाट विगत पाँच वर्षदेखि यसरी जेष्ठ नागरिक घरभेट कार्यक्रम नियमित रुपमा गरिँदै आइरहेको छ । यस पटक ताम्रकार समाजले ७८ वर्ष पूरा गरेका करीब ९० जना जेष्ठ नागरिकहरुको घरघरमा गएर यसरी भेटघाट गरेको थियो । उपसमितिलाई स्वास्थ्य उपसमिति, युवा तथा खेलकुद उपसमिति, धार्मिक क्रियाकलाप उपसमितिले साथ दिएका थिए । भगवानको रुपधारण गरिसकेका जेष्ठ नागरीकहरुको सम्मान गर्न पाउनु समाजको अहोभाग्य भएको ताम्रकार समाजका अध्यक्ष रविन्द्रराज ताम्रकारले बताए । उनले समाजबाट हुँदै आइरहेका विभिन्न कार्यक्रमहरु मध्ये यस कार्यबाट बढी आत्मसन्तुष्टी मिलेको बताउँदै जेष्ठ नागरिकहरुको आर्शिवाद एवं मार्गनिर्देशनबाट समाजले अझ उन्नति प्रगति गर्न सक्ने बताए । उनले जेष्ठ नागरिकहरुको पछाडि सिंगो समाज पनि छ है भन्ने महसूस गराउन यस कार्यक्रमले भूमिका खेलेको बताए ।
समाजले ६ वटा समुह बनाएर ९० जना जेष्ठ नागरिकहरुको घरघरमा पुगेको थियो । उपसमितिका संयोजक विजय ताम्रकारले उनीहरुको आशिषले थप उर्जा प्रदान गर्ने बताए । उनले समाजबाट यस कार्यको अलावा साधारणसभामा पहिलो ज्याः जंक्वः सिधेका ७८ वर्ष पूरा गरेका जेष्ठ नागरिकहरुलाई सम्मान पनि गर्दै आइरहेको बताए । यस कार्यक्रमका लागि समाजलाई उदार मन भएका दाताहरुले सहयोग गरेका थिए ।

प्रकाशित समय १६:२५ बजे