संघीँय समाजवादी फोरम नेपालले चासो नदिँदा राष्ट्रिय जनता पार्टी (राजपा) सँगको एकता अन्यौलमा परेको छ । दुबै दलले एकताका लागि पत्राचार र छलफल अघि बढाए पनि पछिल्लो समय सँघीय फोरमले चासो नदिएपछि छलफलको गतिविधी अघि बढ्न नसकेको हो । फागुन २२ गते सरकारलाई दिएको समर्थन फिर्ता लिएको राजपाले संघीय फोरमलाई पत्र लेखि तत्कालै पार्टी एकता गर्न तयार रहेको बताएको थियो ।

गत मंसिरमै सघीय फोरमले पठाएको पत्रको जवाफ दिँदै राजपाले संघीय फोरमलाई सरकार छाडे मात्रै एकता वार्ता अघि बढ्न सक्ने शर्त राखेको थियो । फोरम सरकार छाड्न अनिच्छुक भएकाले छलफलमा आउन नचाहेको हो । सरकार छाड्नुपर्ने राजपाको शर्तकै कारण पार्टी एकताको पहिलो प्रस्ताव राख्ने संघीय फोरम आफैं व्याक भएको छ । गत मंसिर २३ गते संघीय फोरमले राजपालगायत विचार मिल्ने पार्टीसँग एकताका लागि प्रस्ताव राखेको थियो ।

सरकारले संविधान संशोधन र मधेसका मुद्दा सुनुवाई गर्न कुनै तदारूकता नदेखाए पनि सरकारमा बसिरहेकाले फोरमले पार्टी एकता नचाहेको प्रष्ट देखिएको राजपाका महासचिव मनिषकुमार सुमन बताउँछन् ।

‘उहाँहरु जनताको अगाडि सबै मधेश दल एक हुने, पार्टी एकता गर्ने भन्ने ओठे भक्ति मात्र गाउनुहुन्छ । अनि सरकारमा बसिरहनु हुन्छ, न त संविधान संशोधन गर्न दवाव दिनुहुन्छ न सरकार छाड्न सक्नुहुन्छ,’ सुमनले भने ‘यथास्थितिमा, सरकारमै बसेर फोरमसँग हामी पार्टी एकताका लागि संवाद गर्दैनौँ, अहिले उहाँहरु आफै टाढाटाढा हुनुभएको छ ।’ फोरमलाई मधेशी जनताभन्दा सरकार प्यारो र मधेसीको अजेन्डाभन्दा सत्ता प्रिय बनेपछि वार्ता अघि बढ्न नसकेको सुमनको आरोप छ ।

संघीय फोरमले सहअध्यक्ष राजेन्द्रकुमार श्रेष्ठको संयोजकत्वमा उपाध्यक्ष रकम चेम्जोङ, महासचिव रामसहाय यादव, उपमहासचिव प्रकाश अधिकारी, सचिव इस्तियाक राई र राजनीतिक समिति सदस्य महेन्द्र थापा सदस्य रहेको ६ सदस्यीय वार्ता समिति गठन गरेको थियो । सोही समितिले राजपा, राष्ट्रिय जनमुक्ति पार्टी, नयाँ शक्ति पार्टीलगायतसँग एकाताका लागि पत्राचार गरेको थियो ।
फोरमलगायत अन्य क्षेत्रीय र जातीय पार्टीहरूबीच एकताका लागि चैत १ गते राजपाले पनि राजेन्द्र महतोको संयोजकत्वमा पाँच सदस्यीय वार्ता समिति गठन गरेको छ । र, फोरमले पठाएको पत्रको जवाफसमेत दिएको छ । तर अहिले संघीय फोरमले यथास्थितिवादीसँग सहकार्य गरेर देशमा यथास्थितिवादलाई मलजल गर्ने काम गरिरहेको राजपाको आरोप छ । नेकपा नेतृत्वको सरकारलाई दुई तिहाइ पुर्याएर अग्रगमन एवं परिवर्तनकारी शक्तिलाई धम्कउने मजबुती प्रदान गर्ने काम दुर्भाग्यपूर्ण भएको राजपाको ठहर छ ।

यद्यपि एकताबाट व्याक भएको आरोपको भने संघीय फोरमले अस्विकार गरेको छ । वार्ता समितिका संयोजक तथा पाटीका सहअध्यक्ष राजेन्द्र श्रेष्ठ भन्छन्, ‘विचार, मुद्दा पक्षधरताहरूबीचको एकता अनिवार्य छ, हामी पार्टी एकताका लागि सकारात्मक छौं, वार्ता र छलफलमा आए एकताका ऐजेण्डाबारे छलफल गर्न सकिन्छ ।’

प्रकाशित समय १९:३८ बजे