अख्तियार दुरुपयोग अनुसन्धान आयोगले सवडिभिजन वन कार्यालय लाटीझोडा, मोरंङका सहायक वन अधिकृत सलाउदिन अन्सारीलाई शुक्रबार दिउँसो घुससहित पक्राउ गरेको छ ।
सहायक वन अधिकृत अन्सारीले वन पैदावार उपलब्ध गराउन सिफारिस गरिदिए बापत सेवाग्राहीसँग घुस रकम माग गरेको सूचनाको आधारमा अख्तियार दुरुपयोग अनुसन्धान आयोग इटहरीको टोलीले निगरानी गरेको थियो ।
निगरानीको आधारमा अन्सारीले जिल्ला वन कार्यालय मोरङ विराटनगर परिसरमा सेवाग्राहीसँग ३५ हजार घुस लिँदै गर्दा अख्तियारले पक्राउ गरेको हो । सब डिभिजन प्रमुख अन्सारीले मोरङको केराबारी गाउँपालिका र सुन्दरहरैचा नगरपालिकाभित्र पर्ने १७ वटा सामुदायिक वन र एउटा साझेदारी वन हेर्ने जिम्मेवारी पाएका थिए ।
उनले लाटीझोडा साझेदारी वन पनि हेर्दै आएका छन् । अन्सारीले सामुदायिक वनको रुख कटान गर्ने अनुमति सिफारिसपत्र बनाइदिन समितिसँग बारम्बार घुस माग्ने गरेको उजुरी इटहरीस्थित अख्तियारको कार्यालयमा पुगेको थियो ।
सामुदायिक वनको समिति र उपभोक्तासँग घुस लिएर हैरान बनाएको उजुरी परेपछि अख्तियार दुरुपयोग अनुसन्धान आयोग इटहरीका डिएसपी डिल्लीनारयण पाण्डेको टोलीले सब डिभिजन प्रमुख अन्सारीलाई घुससहित नियन्त्रणमा लिएको हो ।

प्रकाशित समय १९:०९ बजे