आइतबार साँझ बारा र पर्सा जिल्लामा आँधी-हुरी तथा असिनापानीका कारणले कुल २४०४ घरका साथै ३ वटा स्कुल, एउटा स्वास्थ्य चौकी,  २ वटा मन्दिर-मस्जिद भत्किएको गृहमन्त्रालयले जनाएको छ ।

गृह मन्त्रालयमातहतको राष्ट्रिय आपतकालीन कार्यसञ्चालन केन्द्रले बुधबार जारी गरेको बुलेटिनअनुसार बारा जिल्लामा सबैभन्दा धेरै क्षति भएको छ, जहाँ १ हजार ८९५ घरहरू भत्केका छन् । तीमध्ये ९४० घरहरू पूर्ण रूपमा भत्केका छन् भने ९५५ घरहरू आंशिक रूपमा भत्केका छन् ।

यस्तै पर्सामा आँधी-हुरीबाट ५०९ घरहरू भत्केका छन् ।तीमध्ये १२२ घरहरू पूर्ण रूपमा भत्केका छन् भने ३८७ घरहरू आंशिक रूपमा भत्केका छन् । आँधी-हुरीबाट तीन वटा उद्योगमा पनि ठूलो क्षति पुगेको केन्द्रले जनाएको छ । राष्ट्रिय आपतकालीन कार्यसञ्चालन केन्द्रका अनुसार क्षतिको विवरण संकलनका लागि एसेसमेन्ट कोअर्डिनेसन टिम (एसीटी) खटिइसकेको छ भने भौतिक एवं आर्थिक क्षतिको विस्तृत विवरण संकलन थालिएको छ ।

आँधी-हुरीबाट सबैभन्दा प्रभावित क्षेत्रहरूमा बाराका कलैया उप-महानगरपालिका १२ र १८, फेटा गाउँपालिका १, ६ र ७, सुवर्ण गाउँपालिका १, ४, ५ र ८, प्रसौनि गाउँपालिका ४ र ६, महागढीमाई नगरपालिका ७, देवताल गाउँपालिका.- ७, पचरौता नगरपिलका ७ र २, परवानीपुर गाउँपालिकाको ४ नम्वर वडाका बस्तीहरू रहेका छन् ।

यस्तै, पर्साका वीरगंज महानगरपालिका वडा नम्वर १८ र २२ बौदरमाई नगरपालिका ४ का बस्तीहरू रहेका छन् ।

आँधी-हुरीबाट २८ जनाको मृत्यु भएको थियो भने ६७८ जना घाइते भएकामा ४४४ घाइतेहरु उपचारपछि घर फर्किसकेका जनाइएको छ ।

बारा जिल्लामा भएको भौतिक क्षति

पर्सा जिल्लामा भएको भौतिक क्षति

प्रकाशित समय १३:१० बजे