जेठ १३ मा यार्सागुम्बा सङ्कलनका लागि अनुमति खुला गरिने भएपछि शुक्रबारदेखि प्रवेश शुल्क लिएर प्रवेश दिन सुरु गरिएको छ । स्थायी ठेगाना खुल्ने प्रमाणपत्रका आधारमा मात्र प्रवेश शुल्क लिएर यार्सागुम्बा सङ्कलन गर्न प्रवेश दिइएको छ ।

शे फोक्सुण्डो राष्ट्रिय निकुञ्जले शुक्रबारबाट प्रवेश शुल्कबापत मध्यवर्ती क्षेत्रभित्रका सर्वसाधारणका लागि ५ सय, मध्यवर्ती क्षेत्रबाहेक जिल्लाभित्रका सर्वसाधारणका लागि २ हजार र जिल्ला बाहिरका सर्वसाधारणका लागि ३ हजार रुपैयाँ दस्तुर तोकेको छ । त्यसबाहेक मध्यवर्ती क्षेत्रले सेवा शुल्कका रुपमा छुट्टै ५ सय रुपैयाँ लिन पाउने व्यवस्था गरिएको छ । निकुञ्जले छोडपुर्जी दस्तुरबापत ३० हजार रुपैयाँ तोकेकोे छ । पुर्जीको म्याद जेठ १० गतेदेखि असार १० गतेसम्म एक महिनाको अवधि रहने निकुञ्जले जनाएको छ ।

निकुञ्जले जेठ १३ गतेदेखि औपचारिक रुपमा जिल्लाका सम्पूर्ण यार्सापाटन खुलाउने निर्णय गरेको छ । राष्ट्रिय निकुञ्जभित्रका १५ नाकाबाट प्रवेश गर्नेलाई प्रवेश पुर्जी काटिएको शे फोक्सुण्डो राष्ट्रिय निकुञ्जका सूचना अधिकृत छत्र खड्काले जानकारी दिए । निकुञ्ज क्षेत्रमा पर्ने सुलिगाड, सुम्दुवा, छेप्का, पलम, रिग्मो, साल्दाङ, धो, त्रिपुराकोट, खालीवन, नाउली, तोइजुमलगायतका १४ स्थानबाट सङ्कलन पुर्जी वितरण भइरहेको छ ।

यार्सा सङ्कलनका लागि छिमेकी जिल्ला रुकुम, जुम्लालगायत अन्य जिल्लाबाट सर्वसाधारण आएको उनले बताए । यो मौसममा यार्सागुम्बा सङ्कलन गरेर वर्षभरि आफ्ना आधारभूत आवश्यकता पूरा गर्ने उनीहरुको भनाइ थियो । ‘दैनिक आवश्यकता पूरा गर्नका लागि आफू यार्सागुम्बा सङ्कलन गर्न आएकी हुँ,’ रुकुम आठबिसकोट नगरपालिका–११ की हीरा शाहीले बताइन् ।

अघिल्ला वर्षहरुमा भन्दा यो वर्षमा राष्ट्रिय निकुञ्जले चोरी निकासी गर्नेप्रति कडाइ गरेको छ । पाटन प्रवेश गर्न यार्सा सङ्कलनकर्ताले आफ्नो साथमा स्थायी ठेगाना खुल्ने नागरिकता वा परिचयपत्र लिएर आउनुपर्छ । पाटनमा दैनिक खानका लागि खाद्यान्नलगायत सामग्री आपूर्तिका लागि प्रयोग भएका घोडा खच्चरको १५० रुपैयाँ प्रवेश शुल्क लिइएको छ । (रासस)

प्रकाशित समय १३:३९ बजे