जल तथा मौसम विज्ञान विभागअन्तर्गतको मौसम पूर्वानुमान महाशाखाले नेपालको पश्चिमी भूभागबाट न्यून चापीय प्रणालीको प्रवेश भएको भन्दै सतर्क रहन नागरिकलाई अपिल गरेको छ । विशेष मौसम बुलेटिन जारी गरी महाशाखाले बुधबार साँझ नेपाल प्रवेश गरेको न्यून चापीय प्रणाली पूर्व सर्ने क्रममा रहेको भन्दै सतर्क रहन आग्रह गरेको हो ।

यस प्रणालीका कारण नेपालका पश्चिमी उच्च पहाडी र हिमाली भू-भागमा भारी हिमपात हुने सम्भावना छ । यो प्रणाली बिहीबार अझै सशक्त भई देशका मध्य र पूर्वका उच्च पहाडी र हिमाली भू-भागमा समेत हिमपातको सम्भावना रहेको महाशाखाले जनाएको छ ।

उक्त प्रणालीका कारण देशैभर बदली भई अधिकतम र न्यूनतम तापक्रममा गिरावट आई चिसो बढ्ने देखिन्छ । साथै यस प्रणालीका कारण देशका पश्चिमी भू-भागका धेरै स्थानमा र मध्य तथा पूर्वी भू-भागका केही स्थानमा हल्का वर्षाको सम्भावना समेत छ । बुधबारबाट सुरू भई यो मौसमी प्रणाली शनिबारसम्ममा अन्त्य हुने महाशाखाको अनुमान छ ।

प्रकाशित समय २०:०५ बजे