बलात्कारको आरोप लागेका सिद्धबाबा भनिने कृष्णबहादुर गिरीलाई सुनसरी जिल्ला अदालतले थप ७ दिनको म्याद दिएको छ ।

सुनसरीको चतरास्थित आश्रममा बस्दै आएका गिरीलाई जिल्ला अदालत सुनसरीले थप अनुसन्धानका लागि ७ दिनको म्याद दिएको हो । न्यायाधीश मणिराम न्यौपानेको इजलासले गिरीलाई थप ७ दिन अस्पतालमै निगरानीमा रहने गरी म्याद थपेको हो । अदालतले यसअघि तीनपटक गरी १४ दिनको म्याद दिइसकेको छ ।

‘आजबाट लागू हुनेगरी थप भएको ७ दिनभित्र अनुसन्धान सकी अदालतमा उपस्थित गराउनू’ आदेशमा भनिएको छ । जिल्ला प्रहरी कार्यालय सुनसरीका डीएसपी बिनोद शर्माले अदालतको आदेशबमोजिम तत्कालका लागि आरोपित गिरीलाई विराट नर्सिङ होममै फर्काइएको बताए ।

यसअघि प्रहरीले ३ दिनको म्यादसँगै कृष्णदासको मुद्दा अदालतसमक्ष बुझाइने बताएको थियो । सोहीअनुरुप आइतबार प्रहरीले जिल्ला सरकारी वकिल कार्यालय इनरुवामा अनुसन्धान प्रतिवेदन बुझाएको थियो ।

जिल्ला न्यायाधिवक्ता गोकुलबहादुर निरौलाले प्रहरीले अनुसन्धान सकिएको भन्दै अनुसन्धान प्रतिवेदन बुझाए पनि अनुसन्धानको कागजात पर्याप्त र अभियोग पूरक नभएकाले अदालतसमक्ष पुनः थप म्याद मागिएको बताए ।

प्रकाशित समय १९:०३ बजे