विश्वलाई नै त्रसित बनाएर फैलिरहेको कोरोनाका कारण नेपाल पनि प्रभावित बनेको छ । सरकारले अत्यावश्यक बाहेकका सेवाहरु बन्द गरेपछि देश नै ‘सेमि-लकडाउन’ भएको छ ।

शैक्षिक संस्था, होटल रेष्टुराँ तथा मनोरञ्जनस्थलहरु यसअघि नै बन्द भइसकेका छन् । आइतबारबाट बजार पसल समेत बन्द गरिएका छन् । अधिकांश पसलमा ताला लगाइएको छ ।

आइतबार दिउँसो पुग्दा काठमाडौंको प्रमुख व्यापारिक केन्द्र न्युरोडका आधाजसो पसलहरु बन्द गरिएका थिए । एक फेन्सी पसलकी सञ्चालिकाले ग्राहक नै नआएपछि बन्द गर्नु परेको बताइन् । ‘भाइरसको डरले पनि पसल बन्द गर्न लागेकी हुँ । सरकारले भनेको कुराहरु सुनेपछि सतर्क हुनैपर्ने ठानेर घरमै बस्ने बिचारमा छु,’ उनले न्युज कारोबारसँग भनिन् । व्यापार ठप्प भएको भन्दा पनि कोरोना महामारीले देशमै विपत्ति आइलाग्ला कि भन्नेमा आफूलाई बढी चिन्ता लागेको उनले बताइन् ।

असनमा पुग्दा पनि अवस्था त्यही देखियो । ‘सरकारले जनताकै सुरक्षाका लागि भनेको हो । हामीले अटेर गर्नुहुन्न । म पनि अब पसल थुन्न लाग्दैछु,’ इलेक्ट्रोनिक सामानका एक व्यापारीले भने ।

विशालबजारका प्राय पसलहरुका पनि ताला झुण्डिएको थियो । खुलेका पसलहरु पनि सुनसान थिए । ‘केही व्यापार भइहाल्ला कि’ भन्ने सोचले पसल खोलेका व्यापारीहरु ग्राहक नआउँदा चिन्तित देखिन्थे ।

पसल बन्द भएपछि भरियाहरु पनि फुर्सदिला बनेका थिए । बसन्तपुर पुग्दा हातमा नाम्लो लिएका भरियाहरु आफ्नै सुरमा हिँडिरहेका देखिन्थे । अरुबेला भारी पाउने आशामा चारैतिर नजर डुलाउँदै हिँड्ने उनीहरु निराशझैँ लाग्थे ।

सहरी क्षेत्र मात्र हैन, यत्तिखेर सिंगो देश नै कोरोनाको त्रासमा छ । नेपालमा कोरोना संक्रमण नदेखिए पनि मानिसहरु भने त्रसित छन् । अत्यावश्यक काममा बाहेक घरबाहिर ननिस्कन सरकार तथा स्थानीय प्रशासनले आग्रह गरेको छ । संक्रमणबाट जोगिन अपनाउनुपर्ने सन्देशमुलक जानकारीहरु विभिन्न माध्यमबाट जारी भइरहेको छ ।

प्रकाशित समय २०:२३ बजे