कामको सिलसिलामा भारतको विभिन्न स्थान पुगेर उतै रोकिएका कर्णालीका स्थानीयहरु घर फर्कने क्रम अझै जारी छ । लकडाउन सुरु भएयता लुकीछिपी तथा प्रशासनको प्रावधान पालना गर्दै हजारौँ कर्णालीवासी घर फर्किएका छन् ।

बिहीबार १९ सय ३० जना कर्णाली भित्रिएको आन्तरिक मामिला तथा कानुन मन्त्रालयले जनाएको छ । मन्त्रालयका सूचना अधिकारी कृष्णबहादुर रोकायका अनुसार उनीहरुलाई ४९ वटा बसमार्फत प्रहरीको स्कर्टिङसहित कर्णाली भित्र्याइएको हो ।

घर फर्किनेहरुमा सुर्खेतका ४ सय ९७, दैलेखका ८ सय २९, सल्यानका ४ सय ५८, कालिकोटका ५४,जाजरकोटका ८१ र जुम्लाका ११ जना रहेका छन् । उनीहरुलाई आरडीटी परीक्षण गरी सम्बन्धित स्थानीय तहमा लैजाने तयारी भएको सूचना अधिकारी रोकायले बताए । आज घर फर्काइएका उनीहरु यसअघि विभिन्न समयमा प्रदेश ५ र कर्णालीको सीमा क्षेत्र बबईमा आएर बसेका थिए ।

प्रकाशित समय १६:०० बजे