जनकपुरस्थित कोरोना विशेष अस्पतालको आइसोलेसन वार्डबाट फरार भएका कोरोना संक्रमित व्यक्ति फेला परेका छन् । सर्लाही, धनकौलाका ४० वर्षीय संक्रमित ती पुरुष मानसिक रोगीसमेत हुन् ।

उनलाई धनकौलामै फेला पारेर जनकपुर ल्याउन लागिएको जिल्ला प्रहरी कार्यालय धनुषाका डीएसपी रामेश्वर कार्कीले जानकारी दिए । उनी कोठामा रहेको सीसीटीभी क्यामेरा बटार्दै झ्याल फोडेर फरार भएका थिए ।

अस्पतालका कोभिड- १९ फोकल पर्सन डा. कुलदीप पण्डितका अनुसार उनको आइतबार १४औं दिनको स्वाब संकलन गर्ने तयारी थियो । यसअघि पनि भागेर रातारात गाउँ पुगेका उनलाई पुन: अस्पताल फर्काइएको थियो ।

मानसिक सन्तुलन ठीक नभएका कारण उनलाई छुट्टै कोठामा राखिदै आएको छ । उनलाई मानसिक रोग विशेषज्ञले पनि उपचार गरिरहेका छन् । उनी गत वैशाख ३१ गते अस्पताल भर्ना भएका थिए ।

प्रकाशित समय १८:५८ बजे